යෝජිත නව ව්‍යවස්ථාවෙන් තමන් ඉල්ලා සිටිනුයේ දෙමළ ජනයාට පිළිගත හැකි දේශපාලන විසඳුමක් බවට දෙමළ ජාතික සන්ධානයේ පාර්ලිමේන්තු මන්ත්‍රීවරයෙකු ප්‍රකාශ කර තිබේ.
දෙමළ ජනතාවට දේශපාලන විසඳුමක් ලබාදීම වෙනුවෙන් දෙමල ජාතික සන්ධානයේ පාර්ලිමේන්තු මන්ත්‍රී එම්.ඒ සුමන්තිරන් සිදුකරන මැදිහත්වීම ඇගයීම සඳහා ඔහුට “දෙමළ ජනතාවගේ ආරක්ෂකයා” ලෙස ගෞරවය පිරිනැමීම වෙනුවෙන් පැවති උත්සවයේදී මන්ත්‍රීවරයා මේ බව කියා සිටියේය.
“අපි ඉල්ලන්නේ දෙමළ මිනිසුන්ට නව ව්‍යවස්ථාවක් හරහා දේශපාලන විසඳුමක්. දේශපාලන විසඳුමක් ආවොත් වැඩිපුර බලතල පළාත් සභාවලට දිය යුතුයි. මධ්‍යම රජය මැදිහත් වෙන්න හොඳ නැහැ. මෙම යෝජනා අපි ආණ්ඩුක්‍රම ව්‍යවස්ථා කෙටුම්පතට ඇතුළත් කර තිබෙනවා. ඒකීය රාජ්‍යයක් කියන්නේ හා ඔරුමිත්තනාඩු කියන්නේ මොකද්ද කියලා ව්‍යවස්ථා යෝජනාව කියෙව්වොත් පැහැදිලි වෙයි.”
තෛපොංගල් දින පණිවුඩයේදී හිටපු ජනාධිපති මහින්ද රාජපක්ෂ විසින් දෙමළ මිනිස්සු වෙනුවෙන් දේශපාලන විසඳුමක් ලබා දිය යුතු බවට කල ප්‍රකාශ සිහිපත් කල මන්ත්‍රීවරයා “එහෙම දෙයක් හිටපු ජනාධිපතිවරයා කියපු එක ගැන අපි සතුටු වෙනවා.” යි සඳහන් කළේය.
යෝජිත නව ව්‍යවස්ථාව පිළිබඳව පාර්ලිමේන්තුවට ඉදිරිපත් කරන ලද වාර්තා වල රට බෙදන කිසිඳු යෝජනාවක් ඇතුලත් ව නැති බව කී මන්ත්‍රීවරයා එහි ඇතුලත්ව ඇත්තේ බල බෙදීම සඳහා වු යෝජනාවක් බවයි අවධාරණය කරන්නේ.
“යළි ලේ ගංගාවක් ඇති වෙන්න ඉඩදෙන්න එපා. හරිවිදිහට මේ ප්‍රශ්නවලට විසඳුමක් සොයන්නයි අපි කැමති.” යැයි දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ සුමන්තිරන් වැඩි දුරටත් කියා සිටියේය.
Facebook Comments
