අඟුණකොළපැලැස්ස බන්ධනාගාරයේ රැඳවියන් හට කරන ලද පැමිණිල්ලක් ගැන මේ වන තෙක් ක්‍රියාමාර්ග නොගැනීමට එරෙහිව බන්ධනාගාර රැඳවියන්ගේ අයිතිවාසිකම් සුරැකීමේ කමිටුව පොලිස්පතිවරයාට එන්තරවාසි යවා තිබේ.
එම කමිටුවේ කැඳවුම්කාර වැල්ලගේ සුදේශ් නන්දිමාල් සිල්වා වෙනුවෙන් ඔහුගේ නීතිඥ සේනක පෙරේරා පොලිස්පති පුජිත් ජයසුන්දර වෙත එන්තරවාසියක් යොමු කරමින් අදාළ සිද්ධිය පිළිබඳව දින පහක් ඇතුලත නීතිය ක්‍රියාත්මක නොකළහොත් පොලිස්පතිවරයාට එරෙහිව නීතිය ක්‍රියාත්මක කරන බවට පවසා ඇත.
“මාගේ සේවාදායකයාගේ උපදෙස් අනුව කියා සිටින්නේ ඔහු විසින් ඉදිරිපත් කරන ලද මෙම පැමිණිල්ල රජයේ ආයතනයක් තුළ සිදු කරන ලද ඉතා බරපතල අපරාධයක් සම්බන්ධයෙන් වන පැමිණිල්ලකි. එසේම මෙම අපරාධය ශ්‍රී ලංකාව විසින් අත්සන් තබා ඇති වධහිංසා පනත වැනි ජාත්‍යන්තර ප්‍රඥප්තීන්ටද එරෙහිව කරන ලද්දකි.”
“එබැවින් මෙයින් දන්වා සිටින්නේ මාගේ සේවාදායක විසින් ඉහත කී අපරාධ පරීක්ෂණ දෙපාර්තමේන්තුවට ඉදිරිපත් කරන ලද 2019.01.15 සහ යොමු අංක 2 දරන පැමිණිල්ල විභාග කර මේකී අපරාධයට සම්බන්ධ සියලු සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසයි.”
“මාගේ සේවාදායකගේ උපදෙස් පරිදි මෙම කාරණය. මෙම එන්තරවාසිය ලැබී දින 5 ක් ඇතුලත (ඉරිදා, සෙනසුරාදා සහ අනෙකුත් රජයේ නිවාඩු දිනද ඇතුලත්ව) ඉටු නොකරන්නේනම් ඔබට එරෙහිව නීතිමය පියවර ගැනීමට සිදුවන බව මෙයින් දන්වා සිටිමි”. සුදේශ් නන්දිමාල් සිල්වා වෙනුවෙන් නීතිඥ සේනක පෙරේරා විසින් පොලිස්පතිවරයාට යොමු කළ එන්තරවාසියේ වැඩිදුරටත් සදහන් කර ඇත.
Facebook Comments
