නැවත වතාවක් හදිසි නීතිය දීර්ඝ කිරීමේ අවශ්‍යතාවක් මතු නොවනු ඇතැයි ජනාධිපතිවරයා විදෙස් තානාපතින් හමුවේ විශ්වාසය පළ කර තිබේ.
පාස්කු ඉරිදා ප්‍රහාරයෙන් පසුව රටේ ආරක්ෂක තත්ත්වය පිළිබව සහ ආරක්ෂක අංශ විසින් සිදු කරනු ලබන මෙහෙයුම් සම්බන්ධව විදෙස් තානාපතිවරුන් හා ජනාධිපති මෛත්‍රීපාල සිරිසේන අතර 27 සඳුදා පැවති සාකච්ඡාවක දී ජනපති එලෙස පැවසු බව ජනාධිපති මාධ්‍ය ඒකක වාර්තා කර ඇත.
රටේ වත්මන් ආරක්ෂක තත්ත්වය සියයට අනූ නවයක් යහපත් බවට තමාට සහතික විය හැකි බවට ජනාධිපතිවරයා තනාපතිවරුන් හමුවේ ප්‍රකාශ කර තිබේ.
ආරක්ෂක අංශ සහ බුද්ධි අංශ සිදුකළ සාර්ථක මෙහෙයුම් ආරක්ෂාව තහවුරු වීමට බලපෑ බව පෙන්වා දී ඇති ජනාධිපතිවරයා මෙහෙයුම් සඳහා විදෙස් බුද්ධි අංශවලින් මෙරට ආරක්ෂක අංශ වෙත ලැබුණ සහාය ඇඟයීමට ලක් කළේය.
ජාතික ආරක්ෂක වැඩපිළිවෙළේ දී විදේශ රටවල් ලබා දෙන සහාය මෙන්ම ආර්ථික සංවර්ධනය සඳහා ලබාදෙන සහාය ද අඛණ්ඩව අපේක්ෂා කරන බව සඳහන් කර ඇති ජනපති පාස්කු ඉරිදා සිදුවීමත් සමඟ සංචාරකයන් සඳහා පනවා ඇති බාධක කඩිනමින් ඉවත්කර ගැනීමට සහාය වන ලෙස ද තානාපතිවරුන්ගෙන් ඉල්ලා සිටියේය.
මෙවැනි ප්‍රහාර යළි ඇති නොවන බව සහතික කිරීම සඳහා ආරක්ෂක සේවාවන්හි ප්‍රතිසංවිධානයක් සිදුකරමින් පවතින බවත්, නව නීති සම්පාදනය සහ නව ආයතන ව්‍යුහයක් ස්ථාපනය කිරීමට ද කටයුතු කරගෙන යන බවද ජනාධිපතිවරයා පවසා ඇත.
එක්සත් රාජධානිය, එක්සත් ජනපදය, කැනඩාව, ජපානය, ජර්මනිය, ඕස්ට්‍රේලියාව සහ යුරෝපීය සංගමයට අයත් තානාපතිවරු මෙම හමුවට එක්ව සිටි බව පවසන ජනාධිපති මාධ්‍ය අංශය ශ්‍රී ලංකාවට පැමිණීමේ දී එම රටවල් සංචාරකයන් සඳහා පනවා ඇති බාධා කඩිනමින් ඉවත්කිරීමට අවශ්‍ය මැදිහත්වීම සිදුකරන බවට ද ප්‍රතිඥා දුන් බව වැඩි දුරටත් සඳහන් කරයි.
Facebook Comments
