එක්සත් ජාතික පක්ෂය තුළ ද ෆැසිස්ට්වාදි මතධාරින් සිටින බවට රනිල් හිතවාදී වාමාංශික නායකයකු ප්‍රකාශ කර තිබේ.
තමන් ඇතුලු වාමාංශික පිරිස් හා ප්‍රගතිශිලින් එජාපය සමඟ එක්ව ෆැසිස්ට්වාදයට එරෙහි සටන් වැදීම නිසා එම පිරිස් වල “බඩ දඟලන්න පටන් අරන් තියෙන” බව නව සම සමාජ පක්ෂයේ නායකයා පවසයි.
“එක්සත් ජාතික පක්ෂය තුළත් ඉන්නවා ප්‍රතිගාමී ෆැසිස්ට්වාදී මත තියෙන අය. ඒ අයගේ බඩ දඟලන්න පටන් අරන් තියෙනවා. ඒගොල්ලෝ ඒක නිසා එතන ප්‍රශ්නයක් ඇති වෙලා තියෙනවා.” යි ආචාර්ය වික්‍රමබාහු කරුණාරත්න නව සම සමාජ පක්ෂයේ 42 වන සංවත්සර දෙසුම පවත්වමින් කියා සිටියේය.
එජාපය ලිබරල් පක්ෂයක් බව හැඳින්වු නසසප නායකයා එහි සිටින ප්‍රතිගාමී ෆැසිස්ට්වාදී මතධාරින් හට තමන් ඇතුලු පිරිස ප්‍රශ්නයක් ඇති කළ බව ද සඳහන් කළේය.
එක්සත්ව ෆැසිස්ට්වාදයට එරෙහිව සටනක් දියත් කිරීම නිසා එම ප්‍රශ්න ඇතිවු බව පෙන්වා දෙන ආචාර්ය වික්‍රමබාහු එසේ නොවුනේ නම් ඔවුන් එජාපය ද ගිල ගන්නා බවයි කියා සිටියේ.
“සමහර උදවිය ප්‍රතිගාමී, ජාතිවාදී, ආගම්වාදී, ෆැසිස්ට්වාදී අය මේකෙ ඇතුලේ ඉන්නවා කියලා අපි ඒ අයට එළිදරව් කරලා දීලා තියෙනවා. ඒ නිසා අපිට ඒකෙන් ජයග්‍රහණයක් ඇති වෙලා තියෙනවා.”
එක්සත් සටන් ක්‍රියාමාර්ග හරහා ඉදිරියේදී ෆැසිස්ටාවාදී නොවන බලවේග පාර්ලිමේන්තුව යැවිය යුතු බවට හා එමඟින් ගෝඨාභය සහ මහින්දගේ ෆැසිස්ට්වාදී බලය තුනී කර දැමීමට උත්සාහ කළ යුතු බවට නව සම සමාජ පක්ෂ නායකයා ආචාර්ය වික්‍රමබාහු කරුණාරත්න වැඩි දුරටත් යෝජනා කර සිටී.
Facebook Comments
