සංහිඳියාව සම්බන්ධයෙන් මේ වනවිට රට තුළ ඇතිව තිබෙන කතාබහා ඉතා හොඳ වර්ධනයක් බව පෙන්වා දෙන සම්මානලාභි ගත්කතුවරයෙක් අවංකව ලෙස සංහිඳියාව යථාර්ථයක් බවට පත් කරවීමටනම් කතාවට එහා ගොස් නීතිමය හා ව්‍යුහමය වෙනසකට රට ගමන් කල යුතු බව අවධාරණය කරයි.
පසුගිය කාලයේදී මෙරට සිදුවු ක්‍රියාවන් දෙස බැලීමේදී ශ්‍රී ලංකාවේ සංහිඳියා ගැටලුව විසදීමේ ක්‍රියාමාර්ග කතිකාවෙන් ඔබ්බට ගොස් ඇති බවක් පෙන්නුම් කරන අතර සංහිඳියාව ගොඩනැංවීමට නම් දෘෂ්‍යමාන ක්‍රීයාවන්ගෙන් එහා ගිය දේශපාලනික විසඳුම් ලබා දිය යුතු බවයි සම්මානලාභි ගත්කතුවර ලියනගේ අමරකීර්ති පෙන්වා දෙන්නේ.
සංහිඳයාව රටේ බහුතර ජන කොටසේ අනුකම්පාව මත ඇති කල නොහැකි දෙයක් බව ආචාර්ය ලියනගේ අමරකීර්ති පවසා සිටියේ රජය විසින් නම් කර ඇති ජාතික ඒකාබද්ධතා හා සහජීවන සතිය පිළිබඳව සිලෝන් ජර්නල්ස් වෙත අදහස් දක්වමිනි.
ප්‍රදේශිය බලය විමධ්‍යගත කිරිමක්
නීතිමය වශයෙන් සියලු ජන කොටස්හි අයිතිවාසිකම් තහවුරු කර ඒවා ආයතනික මට්ටමිකින් ක්‍රියාත්මක වන ව්‍යුහයක් ඇති නොවන තාක් සංහිඳයාව ඇති කරවීමට නොහැකි වනු ඇති බවට ආචාර්යවරයා විශ්වාසය පළ කළේය.
සියලුම ප්‍රදේශ සඳහා බලපැවැත්වෙන පරිදි ප්‍රදේශිය බලය විමධ්‍යගත කිරිමක් හරහා සියලු ජන කොටස් වලට තම තමන්ගේ ප්‍රශ්න තමන්ටම විසඳාගත හැකි යම් නීතිමය ආයතනික ක්‍රමවේදයක් ගොඩනැඟිම වඩා සුදුසු බව යෝජනා කරන ලියනගේ අමරකීර්ති වැඩි දුරටත් පෙන්වා දෙන්නේ එවැනි ව්‍යුහමය ගැටලු විසඳිමක් ලබා නොදී සංහිඳියාව යාථාර්ථයක් නොවන බවයි.
සිංහල බෞද්ධයා කේන්ද්‍රියයි
රටේ ජාතික ප්‍රශ්නය විසඳිමේදි දකුණේ සිංහල බෞද්ධ ජනයා කේන්ද්‍රිය සාධකයක් බව පෙන්වා දෙන ගත්කතුවරයා පවසන්නේ සම්පුර්ණ ලෞකික ව්‍යවස්ථාවකින් ජාතික ප්‍රශ්නයට විසදුමක් ලැබෙනු ඇති බවට තමන් විශ්වාසද කලද මේ මොහෙතේ පවතින දේශපාලන ගතිකයන් මත එවැනි ව්‍යවස්ථාවකින් දැනට සිදුව ඇති ප්‍රගතිශිලී වෙනස් කම් පවා ආපසු හැරෙවේ දැයි තමන්ට ද සැක පහල වන බවයි.
හිටපු ජනාධිපතිවරයා ප්‍රමුඛ ඒකාබද්ධ විපක්ෂය වැනි කණ්ඩායම් ඉතාම නරක ආකාරයට පුංචි වර්ධනයක් පවා සිංහලයාට එරෙහි කුමන්ත්‍රණයක්, ජාත්‍යන්තර කුමන්ත්‍රණ ලෙස හුවා දැක්වීමට උත්සාහ කරන මොහොතක යෝජිත නව ආණ්ඩුක්‍රම ව්‍යවස්ථාව සාර්ථක කරගැනීමටනම් එයට ඇතුලත් විය යුතු කාරණා සමිබන්ධව උපක්‍රමශිලි හා කල්පනාකාරී විය යුතු බවටයි ආචාර්ය ලියනගේ අමරකීර්ති යෝජනා කරන්නේ.
මෙ‍රටේ සුජාතා පුරවැසියන් සිංහල බෞද්ධයන් පමණක් යන ආකල්පයෙන් බැහැරව සිංහල බෞද්ධයන් පින වන අාකාරයේ විසදුමකින් තොරව සියලු දෙනාම ලංකීක පුරවැසියන් ලෙස සලකා සියලු ජන කොටස් වල අයිතිවාසිකම් ආරක්ෂ වන නීතිමය ව්‍යුහයකින් ජාතික ප්‍රශ්නයට විසදුමක් නොදෙන තාක් එය විසඳිය නොහැකි බවට ගත්කතුවර ලියනගේ අමරකීර්ති තවදුරටත් අනතුරු ඇගවීය.
Facebook Comments
