නව ඖෂධ නිෂ්පාදනාගාරය ඉදිකිරීමට ජපානයෙන් ආධාර

රාජ්‍ය ඖෂධ නිෂ්පාදන සංස්ථාවේ ඖෂධ නිෂ්පාදන ධාරිතාවය වැඩිදියුණු කිරීම සදහා අදාල යටිතල පහසුකම් සහ නවීන යන්ත්‍රෝපකරණ සහිතව නව ඖෂධ නිෂ්පාදනාගාරය ඉදිකිරීම සදහා ජපානය සමග ගිවිසුම් අත්සන් කිරීම සෞඛ්‍ය අමාත්‍යාංශයේ දී පසුගියදා සිදු කෙරිනි.

සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න ප්‍රධානත්වයෙන් මෙම ගිවිසුම අත්සන් කිරිම සිදුවු අතර අමාත්‍යාංශය වෙනුවන් සෞඛ්‍ය ලේකම් අනුර ජයවික්‍රම සහ රාජ්‍ය ඖෂධ නිෂ්පාදන සංස්ථාවේ සභාපති වෛද්‍ය සයුරු සමරසුන්දර ගිවිසුමට අත්සන් කරන ලදි.

ජපානය වෙනුවෙන් එම නිෂ්පාදනාගාරය ඉදිකරන ජපාන කතිමංසු සංස්ථාවේ ව්‍යාපෘති කළමණාකරු මොතොකෝ යොකෝසි මහතා ගිවිසුමට අත්සන් කරන ලදි. නව නිෂ්පාදනාගාරය ඉදිකිරිම සදහා වැය කරන මුදල රුපියල් බිලියන 1.5 කි.

“රාජ්‍ය ඖෂධ නිෂ්පාදන සංස්ථාවේ මේ වනවිට වාර්ෂිකව ඖෂධ පෙති මිලියන 1,900 ක් නිෂ්පාදනය කරනවා. නව නිෂ්පාදනාගාරය ස්ථාපිත කිරීමෙන් පසු එය මිලියන 3,800 දක්වා වැඩි වෙනවා. රජයේ රෝහල්වලට අවශ්‍ය ඖෂධ වර්ග වලින් 43% ක් නිෂ්පාදනය කරන්නේ රාජ්‍ය ඖෂධ නීතිගත සංස්ථාවයි. නව නිෂ්පාදනාගාරයෙන් එය 70 % දක්වා වැඩි වෙනවා. සෞඛ්‍ය සේවාව නොමිලයේ ලබාදීම සදහා අවශ්‍ය සියළුම පියවර රජය විසින් ගනු ලබන අතර, රෝහල්වලට අවශ්‍ය ඖෂධ මාස 02 ක තොඟයක් වෛද්‍ය සැපයුම් අංශය සතුව තිඛෙනවා. රාජ්‍ය ඖෂධ නිෂ්පාදන සංස්ථාව සමග සමාගම් 24 ක් ඖෂධ නිෂ්පාදනය කිරිමට ගිවිසුම් අත්සන් කර තිඛෙනවා. තවත් සමාගම් 08 ක් ස්වාධිනව ඖෂධ නිෂ්පාදනය කිරිමට සුදානම්. තවත් සමාගම් 07 ක් ඉදිරියේ දී ඖෂධ නිෂ්පාදනය කිරිමට එක්වීමට නියමිතයි. මාගේ බලාපොරොත්තුව 2018 අවසන් වන විට ඖෂධ වලින් 80% ක් දේශීයව නිෂ්පාදනය කිරිමටයි.” යනුවෙන් මෙහිදී සෞඛ්‍ය අමත්‍යවරයා පැවසීය.

ශ්‍රී ලංකාවට අවශ්‍ය ඖෂධ ආනයනය කිරීම සදහා වාර්ෂිකව රජය විසින් රුපියල් බිලියන 60 ක් වැය කරන අතර ඖෂධ කර්මාන්තපුර ඉදිකිරීම සදහා කළුතර, හොරණ සහ කුරුණෑගල ඉඩම් ලබාගැනිමට අපි සැළසුම් කර තිඛෙනවා. සෑම ඖෂධයක්ම හිඟයකින් තොරව ලබාදීමට රජයේ බලාපොරොත්තුව බවයි ඇමතිවරයා පෙන්වා දෙන්නේ.

ඖෂධ නිෂ්පාදනය කිරීම සදහා අවශ්‍ය අමුද්‍රව්‍ය දේශීය නිෂ්පාදනය කිරීමට ද සැළසුම් කර ඇති බව මෙහිදී අදහස් දැක්වූ රාජ්‍ය ඖෂධ නිෂ්පාදන සංස්ථාවේ සභාපති වෛද්‍ය සයුරු සමරසුන්දර ප්‍රකාශ කළේය.