ජීවිතාන්තය දක්වා බන්ධනාගාර ගත කොට සිටින සිරකරුවකු මානුෂික පදනමින් නිදහස් කරන ලෙස ඉල්ලා ආයාචනා කරමින් අත්සන් ලබා ගත් පෙත්සමක් ජනාධිපතිවරයා වෙත යොමු කර තිබේ.
දේශපාලන සිරකරුවෙකු වන සච්චිතානන්දම් ආනන්ද සුදාහරන් නිදහස් කරන ලෙස ඉල්ලා ලංකා දෙමළ ගුරු සංගමය විසින් දියත් කරන ලද පෙත්සම තුන් ලක්ෂයකට වැඩි අත්සන් සහිතව ජනාධිපති මෛත්‍රීපාල සිරිසේන වෙත යැවීම සඳහා 17 අඟහරුවාදා උතුරු පලාත් වැඩ බලන මහඇමැති කන්දෛයියා සර්වේස්වරන් වෙත බාර දෙන ලදී.
අම්මා නැති දරු දෙදෙනකුගේ පියකු වන වැලිකඩ බන්ධනාගාරයේ සිර කොට සිටින සච්චිතානන්දම් ආනන්ද සුදාහරන් හට සමාව දී මානුෂික පදනමින් ඔහු නිදහස් කරන ලෙස එම පෙත්සමෙන් අයාචනා කර සිටි.
රෝගීව සිටි සච්චිතානන්දම් ආනන්ද සුදාකරන්ගේ තරුණ බිරිද පසුගියදා මියගිය අතර බිරිඳට අවසන් ගෞරව පිදීම සඳහා කිලිනොච්චි ගෙන එනු ලැබූ සුදාකරන් බන්ධනාගාරය බලා ආපසු ගෙනයාමට බස් රථයට නංවා ගනිද්දී ඔහු රඳවා ගැනීමට අසාර්ථක වෑයමක් ගත් දරු දෙදෙනා හඬ වැලපෙමින් බස් රථයට නැඟ යාමට උත්සාහ දරන අයුරු දැක්වෙන හද කම්පා කරවන විඩියෝවක් මාධ්‍ය මඟින් ප්‍රචාරණය විය.
ප්‍රතිචාරයක් නැත
ජිවිතාන්තය දක්වා සිරකර ඇති තමා පියා නිදහස් කරන ලෙස ඉල්ලා දහතුන් හැවිරිදි ආනන්ද සුදාහරන් සංගීතා විසින් ජනාධිපතිවරයාගේ දියණිය වන දර්ශණි චතුරිකා සිරිසේන හට යොමු කරන ලද ලිපියට ද මෙතෙක් ප්‍රතිචාරයක් නොලද බවයි ඔවුන් පවසන්නේ.
ආන්නද සුදාරහන් සංගීතා සහ ඇගේ සොහොයුරා විසින් තම පියා වන සචින්තනම් ආනන්ද සුදාහරන් නිදහස් කරන ලෙස සහ ජනාපතිවරයා හමුවීමට දිනයක් ලබා දෙන ලෙස ඉල්ලා ලියමනක් යොමු කර ඇති නමුත් මෙතෙක් ඔවුන් හට එම අවස්ථාව ද ලැබී නැත.
Facebook Comments
