කෙටුම්පතක් හෝ සකස් කර නොමැති ව්‍යවස්ථාවකින් රට බෙදෙනවා, රට කැඩෙනවා කියා විපක්ෂය අසත්‍ය ප්‍රචාරයක් ගෙන යන බවට අගමැතිවරයා චෝදනා කර තිබේ.
“ව්‍යවස්ථාවේ රට කැඩෙන බවට චෝදනා කළත් තවම ආණ්ඩු ක්‍රම ව්‍යවස්ථාවත් අපි සකස් කර නැහැ. අඩුම තරමින් ව්‍යවස්ථා කෙටුම්පතවත් හදලා නැහැ. නමුත් පාර්ලිමේන්තුවම එකතු කර ව්‍යවස්ථාදායක සභාවක් පත් කළා. සියලූ පක්‍ෂ නියෝජනය වන පරිදි මෙහෙයුම් කමිටුවක් පත් කළා. එහි සභාපති ලෙස මා කටයුතු කරනවා. එහිදී ඉදිරිපත්ව ඇති සියලූ යෝජනා සාකච්ඡාවට භාජනය වුණා. ඒ අනුව එම අදහස් හා යෝජනා අනුව අන්තර් වාර්තාවක් සකස් කළා.”
ආණ්ඩුක්‍රම ව්‍යවස්ථා කෙටුම්පතක් ගෙන එන්නේ නම් ඊට පාර්ලිමේන්තුවේ තුනෙන් දෙකක සහයෝගය තිබිය යුතු බව පෙන්වා දෙන අගමැති රනිල් වික්‍රමසිංහ එවැනි සහයෝගයක් තිබෙනවා ද නැද්ද කියා අප තවම දන්නේ නැති බවයි පවසන්නේ.
“එහෙම සහයෝගයක් තිබෙනවා නම් ව්‍යවස්ථාව සකස් කරමු. එවැනි සහයෝගයක් නැති නම් ව්‍යවස්ථාව සැකසීමෙන් පළක් නැහැ.” යි අගමැතිවරයා ගාල්ල, කරගොඩ, යක්කලමුල්ල ශ්‍රී පුෂ්පාරාම විහාරස්ථානයේ අභිනවයෙන් ඉදිකරන ලද සංඝාවාසය සහ දහම් පාසල් ගොඩනැගිල් විවෘත කිරීමේ අවස්ථාවට සහභාගි වෙමින් කියා සිටියේය.
රට කලාපවලට බෙදා කලාප සංගමයක් බවට පත් කිරීමට ප්‍රථමයෙන්ම සහයෝගය ලබා දුන්නේ හිටපු ජනාධිපති මහින්ද රාජපක්‍ෂ බව පෙන්වා දුන් අගමැතිවරයා එක්සත් ජාතික පක්‍ෂය ඒකීය රාජ්‍යයක් තුළ බලය බෙදාහැරිය යුතුය යන ස්ථාවරයේ අඛණ්ඩව සිටි බවද සඳහන් කළේය.
“1995 දී මහින්ද රාජපක්‍ෂ මැතිතුමා කලාප සංගමයකට සහයෝගය ලබා දුන්නා. ඊට උදව් කළා. චන්ද්‍රිකා මැතිණිය කලාප සංගම් ක්‍රමය ඇතුළත් ව්‍යවස්ථා කෙටුම් පතක් පාර්ලිමේන්තුවට ඉදිරිපත් කරන අවස්ථාවේ ඇමැතිවරයෙක් ලෙස ඊට උපරීම සහයෝගය ලබා දුන්නා.”
“එදා මහින්ද රාජපක්‍ෂ පෙනී සිටියේ රට කලාපවලට බෙදා කලාප සංගමයක් බවට පත් කිරීමටයි. චන්ඬිකා කුමාරතුංග මැතිණියත් ඒ ස්ථාවරයේ සිටියා. නමුත් මා ඒ ස්ථාවරයේ සිටියේ නැහැ.” යි අගමැතිවරයා පැවසීය.
ඒකීය රාජ්‍යය ආරක්‍ෂා කරමින් ඉදිරිපත් කරන ඕනෑම වැඩපිළිවෙළකට තම සහයෝගය ලබාදීමට සූදානම් නමුත් ඉන් බැහැරව ඉදිරිපත් කරන කිසිදු වැඩපිළිවෙළකට තම සහයෝගය නොලැබෙන බව ද අගමැති රනිල් වික්‍රමසිංහ වැඩි දුරටත් කියා සිටියේය.
Facebook Comments
