ශ්‍රී ලංකාව තුළ මුල් වරට පෙඩරල් පාලනයක් සඳහා සටන් වැදුනේ උඩරට රදළයන් බව රටේ විශාලතම දෙමළ දේශපාලන පක්ෂයේ නායකයා දකුණේ පැවති උත්සවය දී සිහිපත් කර දී තිබේ.
උඩරට සිංහලුන් වෙනුවන් වෙනම පාලනයක් , පහත රට සිංහලයන්ට තවත් පාලනයක් හා උතුරු නැගෙනහිර ජනයා වෙනුවෙන් තවත් පාලන ඒකකයක් උඩරට ප්‍රභූන්ගේ ඉල්ලීම් වලට ඇතුලත් වු බව ආර්. සම්බන්ධන් පෙන්වා දී ඇත.
දෙමළ ජනයා සැම විටම ඉල්ලා සිටියේ එකම රටක් තුළ මුළු රටටම ස්වෛරීත්වය හිමි ස්වරාජ්‍ය ක්‍රමයක් බව දෙමළ සන්ධාන නායකයා 07 ඉරිදා දේශපාලන දිවියට දශක තුනක් සපිරීම නිමිත්තෙන් මංගල සමරවීර අමාත්‍යවරයා පිළිබඳව ලියැවුන “මංගල සමරවීර” කෘතියක් එළි දැක්වීමට මාතර පැවති උත්සවයේදී කියා සිටියේය.
“දෙමළ ජනතාව හැම විටම ඉල්ලා සිටියේ එක්සත් රටක් තුළ සැමටම යුක්තිය හා සාධාරණය ඉටු වෙන රටක් බිහි කරන්න කියලා. යාපනයේ ජනතාව ඉල්ලා සිටියේ ස්වරාජ්‍ය ක්‍රමයක් යටතේ මුළු රටමේ ස්වෛරීත්වය තහවුරු කරන්න කියලා.” ආර්. සම්බන්ධන් සඳහන් කළේය.
එහෙත් නිදහසින් පසුව රට තුළ දේශපාලන තත්ත්වය වෙනස් වු බව කී දෙමළ සන්ධාන නායකයා සිදුවු අසාධාරණකම් හමුවේ සියයට පනහකට වැඩි දෙමළ ජනතාව රට හැර ගිය බවයි පෙන්වා දුන්නේ.
දෙමළ විමුක්ති කොටි සංවිධානය සන්නද්ධ අරගලයක් දක්වා ගමන් කරනු ලැබුවේ දෙමළ ජනයාගේ අයිතීන් ලබා දීමට සිංහල නායකයින් ගිවිස ගත් දෑ සහ පොරොන්දු කඩ කිරීම නිසාවෙන් බව ද ආර්. සම්බන්ධන් මන්ත්‍රීවරයා කියා සිටියේය.
“උතුරේ හෝ දකුණේ වේවා මානව හිමිකම් කඩවු අවස්ථාවක මංගල සමරවීර අමාත්‍යවරයා ඒ වෙනුවෙන් අභිතව පෙනී සිටි නායකයෙක්.” යනුවෙන් මංගල සමරවීර අමාත්‍යවරයා මානව හිමිකම් කඩවුවන් වෙනුවෙන් පෙනී සිටීම දෙමළ සන්ධාන නායකයාගේ ඇගයීමට ලක් විය.
ජාතික ප්‍රශ්නය විසඳා ගැනීමට මංගල සමරවීර අමාත්‍යවරයා සෘජුව පෙනී සිටි බව දෙමළ සන්ධානයක නායක පාර්ලිමේන්තු මන්ත්‍රී ආර්. සම්බන්ධන් වැඩි දුරටත් සඳහන් කළේය.
Facebook Comments
