යුද අපරාධ ගැන ජනපති අපේක්ෂකයන්ට ජාත්‍යන්තර මතක් කිරීමක්

0

එක්සත් ජාතීන් සමඟ ගිවිසගත් පිරිදි යුද පීඩිතයන්ට යුක්තිය ඉටු කිරීමට දුන් පොරොන්දු ඉටු කිරීම ඇතුළු මානව හිමිකම් සහතික කරන ලෙස ජාත්‍යන්තර මානව හිමිකම් සංවිධානයක් ජනාධිපති ධුරාපෙක්ෂකයන්ගෙන් ඉල්ලා සිටී.

යුද පීඩිතයන් වෙනුවෙන් සත්‍යය, යුක්තිය, වන්දි සහ නැවත සිදු නොවීම සඳහා වන පොරොන්දු ඉටු කළ යුතු වග බලයට පත් වීමට අපේක්ෂා කරන්නන්ට සිහිපත් කර දෙන ඇම්නස්ටි ජාත්‍යන්තරයේ දකුණු ආසියා අධ්‍යක්ෂ බිරාජ් පට්නායික් “ශ්‍රී ලංකාවේ ඊළඟ ජනාධිපතිවරයා මානව හිමිකම් ඔවුන්ගේ ප්‍රතිපත්තිවල හෘදය වස්තුව කරගත යුතුයි,” යනුවෙන් නිවේදනයක් නිකුත් කරමින් කියා තිබේ.

අතුරුදහන් වු තැනැත්තන් පිළිබඳ කාර්යාලය (OMP) සහ හානිපූරණ සඳහා වන කාර්යාලයක් පිහිටුවීමත්, යුද හමුදාව වාඩිලාගත් ඉඩම් ප්‍රමාණයක් ආපසු පැවරීම ඇතුළු ක්ෂේත්‍රවල සැලකිය යුතු ප්‍රගතියක් අත් කරගෙන ඇති නුමුත් පසුගිය හතර අවුරුද තුල ජිනීවා ගිවිසුමේ පොරොන්දු ඉටු කිරීමේ ප්‍රගතිය “බියජනක ලෙස මන්දගාමී” යයි ඇම්නස්ටිය පවසයි.

ශ්‍රී ලංකාවේ රජය 2015 එක්සත් ජාතීන්ගේ මානව හිමිකම් කොමිසමේ හවුලේ සම්මතකරගත් යෝජනාව ක්‍රියාත්මක නොකරන බව පොදුජන පෙරමුණේ අපේක්ෂක ගෝඨාභය රාජපක්ෂ විසින් ප්‍රකාශයට පත් කර සිව් දිනක් ගතවෙද්දී ඇම්නස්ටි ජාත්‍යන්තරය ජනපති අපේක්ෂකයන්ගෙන් මෙම ඉල්ලීම් කර තිබේ.

නව ප්‍රජාතන්ත්‍රවාදී පෙරමුණේ සජිත් ප්‍රේමදාස මේ සතිය තුලදී පවසා තිබුනේ ජාත්‍යන්තර කොන්දේසි වලට තමන් යටත් නොවෙන බවයි.

ශ්‍රී ලංකාව ජිනීවාහිදී දුන් පොරොන්දු ඉටු කිරීම සඳහා මෛත්‍රී-රනිල් හවුල් ආණ්ඩුවට කල් දෙන ලෙස දෙමළ විරෝධතා මධ්‍යයේ ජාත්‍යන්තර බලවතුන්ගෙන් ඉල්ලා සිටි සංවිධාන අතර ඇම්නස්ටි ජාත්‍යන්තරය ද වෙයි.

Facebook Comments

wedding people