ශ්‍රී ලංකාවේ පිහිටි ස්විට්සර්ලන්ත තානාපති කාර්යාලයේ නිලධාරිනියක් බලහත්කාරයෙන් පැහැර ගැනීමට හා තර්ජනය කිරීමට ලක්ව ඇතැයි ස්විස්ටර්ලන්ත රජය නිවේදනය කර තිබේ.
තානාපති කාර්යාලයේ තොරතුරු හෙළි කරන ලෙස නාඳුනන පිරිසක් සිය ශ්‍රී ලාංකික කාර්ය මණ්ඩල සාමාජිකාවට තර්ජනය කර ඇතැයි 27 බදාදා ස්විට්සර්ලන්ත විදේශ කටයුතු අමාත්‍යංශය නිකුත් කළ නිවේදනයේ දැක්වේ.
පැය කීපයකට පසු ඇය නිදහස් කර යවා ඇත්තේ සිදුවූ කිසිවක් හෙළි නොකරන ලෙස අනතුරු අඟවමිනි.
මෙම සිදුවීම රාජ්‍ය තාන්ත්‍රික නියෝජනයට සහ එහි සේවකයින්ට එල්ල කළ බරපතළ හා පිළිගත නොහැකි ප්‍රහාරයක් ලෙස ස්විට්සර්ලන්තය අවධාරණය කරන්නේ.
මේ පිළිබඳව ශ්‍රී ලංකා බලධාරින්ගෙන් කඩිනම් හා සම්පූර්ණ පරීක්ෂණයක් ඉල්ලා සිටින එරට රජය සිය තානාපති කාර්යාල නිලධාරින්ගේ ආරක්ෂාව සහතික කරන ලෙසද ඉල්ලීමක් කර ඇත.
ශ්‍රී ලංකාවේ පිහිටි තානාපති කාර්යාලයේ නිලධාරිනියට සිදුවු සිද්ධිය සම්බන්ධව කරුණු පැහැදිලි කිරීමට මෙරට තානාපතිවරයා බර්න් අගනුවරට කැඳවු බවද ස්විට්සර්ලන්ත විදේශ කටයුතු අමාත්‍යංශය නිකුත් කළ නිවේදනයේ සඳහන් කර තිබේ.
මේ අතර මෙම සිද්ධිය සම්බන්ධව අපරාධ පරීක්ෂණ දෙපාර්තමේන්තුව සහ පොලීසිය විමර්ශනයක් ආරම්භ කර ඇතැයි 28 බ්‍රහස්පතින්දා ශ්‍රී ලංකා විදේශ කටයුතු අමාත්‍යාංශය නිවේදනයක් නිකුත් කරමින් කියා සිටී.
Facebook Comments
