නාවික හමුදාව කැස්බෑ දඩයමක් අල්ලයි

0
184
Ivory Agency Sri Lanka
wedding people
Loading...

ලෝකයෙන් වඳ වී යාමේ තර්ජනයට ලක්ව සිටින කැස්බෑවුන්ගේ මස් සහ බිත්තර තොගයක් සමඟ පුද්ගලයන් තිදෙනකු අත්අඩංගුවට ගැනීමට ආරක්ෂක අංශ කටයුතු කර තිබේ.

ත්‍රිකුණාමලය, සීනන්වේලි වෙරළ තීරයේ සිදුකළ සෝදිසි ‍මෙහෙයුමකදී කැස්බෑ මස් සහ කැස්බෑ බිත්තර තොගයක් සමඟ පුද්ගලයන් තිදෙනා මාර්තු 23 සිය භාරයට ගෙන ඇත්තේ නාවික හමුදාව විසිනි.

සැක සහිත ඩිංගි යාත්‍රාවක් පරීක්‍ෂා කිරීමේදී එහි තිබී කැස්බෑ මස් කිලෝ 11 පමණ ප්‍රමාණයක් සහ කැස්බෑ බිත්තර 150ක පමණ ප්‍රමාණයක් සොයා ගැනීමට සමත් වු බව නාවික හමුදාව වැඩි දුරටත් පවසයි.

මෙලෙස නාවික හමුදා භාරයට ගන්නා ලද සැකකරුවන් වයස අවුරුදු 36, 44 සහ 50 වන වියෙහි පසුවන ත්‍රිකුණාමලය, ඉලංගතුරෙයි ප්‍රදේශයේ පදිංචිකරුවන් බවට හදුනාගෙන ඇත.

සැකකරුවන්, කැස්බෑ මස් හා බිත්තර තොගය, ඩිංගි යාත්‍රාව සහ අනෙකුත් ධීවර ආම්පන්න වැඩිදුර විමර්ශන කටයුතු සඳහා ත්‍රිකුණාමලය වනජීවි සංරක්‍ෂණ කාර්යාලය වෙත භාරදීමට කටයුතු කළ බව නාවික හමුදාව පවසයි.

ලෝකයේ වඳ වී යාමේ තර්ජනයට ලක්වෙමින් සිටින සත්ත්ව විශේෂ අතරින් රතු දත්ත ලේඛනයටද ඇතුළත්ව සිටින කැස්බෑවන් සාගර හා වෙරළ ආශ්‍රිත මිනිස් ක්‍රියාකාරකම් හේතුවෙන් දැඩි තර්ජනයට මුහුණපා සිටින සත්ත්ව විශේෂයකි.

බිත්තර දැමීම ලංකාවේ

ලොව පුරා සාගරවාසී කැස්බෑ විශේෂ 7ක් හදුනාගෙන ඇති අතර එයින් විශේෂ 5ක්ම බිත්තර දැමීම සඳහා ශ්‍රී ලංකා වෙරළ තීරය වෙත ඇදී එන බව පරිසරවේදීහු පෙන්වා දෙති.

ලංකාව තුළ දැකිය හැකි කැස්බෑ විශේෂ 5ක් ලෙස බටු කැස්බෑවා (Olive ridley turtle), ඔළුගෙඩි කැස්බෑවා (Loggerhead), ගල් කැස්බෑවා (Green turtle), පොතු කැස්බෑවා (Hawksbill turtle), දාර කැස්බෑවා (Leatherback turtle) යන කැස්බෑවන් හදුනාගෙන තිබේ.

ශ්‍රී ලංකා වනසත්ව හා වෘක්ෂලතා ආඥා පණතේ III වන කොටසේ 30 වන වගන්තියේ සඳහන් නීතිරීතිවලට අනුව කැස්බෑවුන් මැරීම, තුවාල කිරීම, බිත්තර එකතු කිරීම, කූඩු විනාශ කිරීම, ළඟ තබා ගැනීම, සහ කැස්බෑ කොටස් ළඟ තබා ගැනීම ආදී ක්‍රියාවන් නීතියෙන් සපුරා තහනම් වේ.

එහි 30(2) වගන්තිය යටතේ එම ක්‍රියාවන්හි නිරතවෙන වැරදිකරුවන්ට ලබාදිය යුතු දඬුවම් දක්වා තිබෙි.

ඒ අනුව වරදකරු ට රුපියල් දසදහසකට අඩු නොවන රුපියල් තිස්දහසකට වැඩි නොවන දඩයකට හෝ අවුරුදු දෙකකට අඩු නොවන සහ අවුරුදු පහකට වැඩි නොවන කාලයක් සඳහා දෙයාකාරයෙන් එක් ආකාරයක වූ බන්ධනාගාර ගතකිරීම හෝ දඩය සහ දෙකම නියම කළ හැකිය.

වද විමේ තර්ජනයට ලක්ව සිටින ඇල්ලීම නීතියෙන් තහනම් කර ඇති කස මෝරුන් ක්‍රිලෝග්‍රෑම් හයසීයකට වැඩි ප්‍රමාණයක් සිය භාරයට ගැනීමට ශ්‍රී ලංකා නාවික හමුදාව පසුගිය සතියේ සමත්ව තිබුනි.

Facebook Comments

Loading...