අලුත් ආණ්ඩුවේ ඇමැති කුට්ටමේ රාජපක්ෂවරු පහක්

නව රජයේ කැබිනට් හා රාජ්‍ය අමාත්‍ය ධුරයන් සදහා ජනපති, අගමැති සොහොයුරන් ප්‍රමුඛ රාජපක්ෂ පවුලේ සාමාජිකයන් පස් දෙනකු දිවුරුම් දෙද්දී, කාන්තා කටයුතු සහ සුළු ආගම් සියල්ල කැබිනට් විෂය පතයෙන් ඉවත් කොට තිබේ.

මහනුවර ඓතිහාසික ශ්‍රී දළදා මාලිගාවේ මඟුල් මඩුවේ දී අගෝස්තු 12 බදාදා නව කැබිනට් මණ්ඩලය දිවුරුම් දීමේදී ජනාධිපති ගෝඨාභය රාජපක්ෂ, අග්‍රාමාත්‍ය මහින්ද රාජපක්ෂ, චමල් රාජපක්ෂ සහ නාමල් රාජපක්ෂ කැබිනට් මණ්ඩලයට ඇතුල් කරගෙන තිබු අතර හිටපු කතානායකවරයකු වන චමල් රාජපක්ෂගේ පුත් ශෂීන්ද්‍ර රාජපක්ෂ රාජ්‍ය ඇමැතිවරයෙකු වශයෙන් පත් කර තිබුනි.

අමාත්‍යංශ 28 ට සහ රාජ්‍ය අමාත්‍යංශ 40 කින් යුත් නව අමාත්‍ය මණ්ඩලය සදහා නියෝජිතයන් පත් කරද්දී ශ්‍රී ලංකා පොදුජන පෙරමුණේ ප්‍රධානතම හවුල්කාර පක්ෂය වන ශ්‍රී ලංකා නිදහස් පක්ෂයේ සභාපති හිටපු ජනපති මෛත්‍රීපාල සිරිසේනට කිසිඳු අමාත්‍යධුරයක් ලබා නොදීමට ජනපති, අගමැති රාජපක්ෂ සොහොයුරන් වග බලාගෙන තිබේ.

ආරක්ෂක අමාත්‍යවරයාගේ වගකීම ජනාධිපතිවරයා විසින්ම භාර ගනිද්දී අගමැති මහින්ද රාජපක්ෂ වෙත මුදල්/ බුද්ධශාසන, ආගමික හා සංස්කෘතික කටයුතු/ නාගරික සංවර්ධනය හා නිවාස යන කැබිනට් අමාත්‍යධුර තුනම පිරිනමා තිබේ.

රාජපක්ෂ පවුලේ ජ්‍යෙෂ්ඨතම සාමාජිකයා වන හිටපු කතානායක චමල් රාජපක්ෂට වාරිමාර්ග කැබිනට් අමාත්‍යධුරයට අමතරව අභ්‍යන්තර ආරක්ෂක,ස්වදේශ කටයුතු හා ආපදා කළමනාකරණ රාජ්‍ය අමාත්‍යාවරයා ලෙසත් පත් කර ඇත.

වසර 10 ක පාර්ලිමේන්තු අත්දැකීම් සහිත නාමල් රාජපක්ෂට පළමු වතාවට අමාත්‍යධුරයක් ලබා දී ඇති අතර ඔහු තරුණ හා ක්‍රීඩා කටයුතු කැබිනට් අමාත්‍යවරයා ලෙස පත් කිරීමට ජනපති හා අගමැතිවරයා විසින් කටයුතු කර තිබේ.

හිටපු කතානායක චමල් රාජපක්ෂගේ පුත් ශෂීන්ද්‍ර රාජපක්ෂ වී හා ධාන්‍ය, කාබනික ආහාර, එළවළු, පලතුරු, මිරිස්, ළූණු හා අර්තාපල් වගා ප්‍රවර්ධන , බීජ නිෂ්පාදන හා උසස් තාක්ෂණික කෘෂිකර්ම රාජ්‍ය අමාත්‍ය වරයා ලෙස පත් කර ඇත.

ශ්‍රී ලංකා පාර්ලිමේන්තු ඉතිහාසයේ එකම පවුලේ වැඩිම සාමාජිකයන් පිරිසක් එකම කැබිනට් මණ්ඩලයක් නියෝජනය කරන පළමු අවස්ථාව මෙය බව දේශපාලන විචාරකයෝ පවසති.

ඥාති සංග්‍රහ

මීට ඉහතදී හිටපු අගමැතිනි සිරිමාවෝ බණ්ඩාරනායකගේ කැබිනට් මණ්ඩලයේ ( 1970- 1977 ) ඔහුගේ ඥාතිත්වයක් ඇති ෆීලික්ස් ඩයස් බණ්ඩාරනායක කැබිනට් අමාත්‍යධුර දරා ඇත.

හිටපු ජනාධිපතිනි චන්ද්‍රිකා බණ්ඩාරනායක කුමාරතුංගගේ පළමු පාලන සමයේදී ( 1994-2000) ඇයගේ මව වන සිරිමාවෝ බණ්ඩාරනායක වෙත අග්‍රාමාත්‍යධුරය පමණක් පිරිනමා තිබේ.

එමෙන්ම චන්ද්‍රිකා බණ්ඩාරනායක කුමාරතුංගගේ දෙවන ධුර කාලයට අයත් වන (2004-2005 ) සමයේදී ඇයගේ සොයුරු අනුර බණ්ඩාරනායකද සංචාරක, විදේශ කටයුතු, කර්මාන්ත සහ ආයෝජන ප්‍රවර්ධන අමාත්‍යවරයා ලෙස කටයුතු කර ඇත.

එමෙන්ම චන්ද්‍රිකා බණ්ඩාරනායක කුමාරතුංග ජනාධිපතිනියගේ ඥාතීත්වයක් ඇති අනුරුද්ධ රත්වත්තේද අමාත්‍යධුර කිහිපයක් දරා තිබේ.

2005 සිට 2015 දක්වා මහින්ද රාජපක්ෂ ජනාධිපතිවරයා ලෙස කටයුතු කළ වසර 10 ක කාලය තුලදී බැසිල් රාජපක්ෂ, චමල් රාජපක්ෂ යන සොහොයුරන් දෙදෙනාත් කැබිනට් අමාත්‍යධුර දරා ඇත.

කාන්තා, දෙමළ, මුස්ලිම් නියෝජනය

අගෝස්තු 12 වනදා පත් කළ පාර්ලිමේන්තු නියෝජිතයන් 25 දෙනකු සාමාජිකත්වය දරන නව කැබිනට් මණ්ඩලයේ එක් කාන්තා නියෝජනයක් පමණක් දැක ගත හැකි අතර දෙමළ සහ මුස්ලිම් නියෝජනයද එක බැගින් වේ.

පවිත්‍රා වන්නිආරච්චි සෞඛ්‍ය අමාත්‍ය ලෙසත්, ඩග්ලස් දේවානන්ද ධීවර අමාත්‍ය ලෙසත් පළමු වරට ජාතික ලැයිස්තුවෙන් පාර්ලිමේන්තුවට පිවිසීමට නියමිත නීතිඥ අලි සබ්රී අධිකරණ අමාත්‍ය ලෙසත් පත් කර තිබේ.

වියත් මග

වියත්මග සංවිධානය නියෝජනය කරමින් පළමු වරට පාර්ලිමේන්තු වරම් හිමි කරගත් රියාද් අද්මිරාල් සරත් වීරසේකර, ආචාර්ය නාලක ගොඩහේවා, මහාචාර්ය චන්න ජයසුමන හටත් ජනාධිපතිවරයා විසින් රාජ්‍ය අමාත්‍ය ධුරයන් පිරිනමා තිබෙන අතර
ජාතික ලැයිස්තු මන්ත්‍රීධුරයෙන් පාර්ලිමෙන්තුවට තේරී පත්වූ වෛද්‍ය සීතා අරඹේපොල වෙත රාජ්‍ය අමාත්‍යධුරයක් පිරිනැමා තිබේ.

ආචාර්ය සරත් විරසේකර පළාත් සභා හා පළාත් පාලන කටයුතු රාජ්‍ය අමාත්‍ය ලෙසත්, ආචාර්ය නාලක ගොඩහේවා නාගරික සංවර්ධන, වෙරළ සංරක්ෂණ, අපද්‍රව්‍ය බැහැරලීම හා ප්‍රජා පවිත්‍රතා කටයුතු රාජ්‍ය අමාත්‍ය ලෙසත්, විශේෂඥ වෛද්‍ය සිතා අරඹේපොළ නිපුණතා සංවර්ධන, වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍ය ලෙසත් මහාචාර්ය චන්න ජයසුමන ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය ලෙසත් පත්වීම් ලැබ තිබේ.

මේ දක්වා ශ්‍රී ලංකා පාර්ලිමේන්තුව නියෝජනය කළ ජ්‍යෙෂ්ඨ කැබිනට් අමාත්‍යවරන් ලෙස නම් දරා සිටි හිටපු ජනාධිපති මෛත්‍රීපාල සිරිසේන, සුසිල් ප්‍රේමජයන්ත, එස්.බී. දිසානායක, ජොන් සෙනවිරත්න, චන්දිම වීරක්කොඩි, ඩිලාන් පෙරේරා, මහින්ද යාපා, මහින්ද සමරසිංහ, රන්ජිත් සියඹලාපිටිය හා අනුර යාපා සහ විජේදාස රාජපක්ෂට නව රජයේ කිසිදු ඇමති ධුරයක් හිමි නොවීම විශේෂත්වයකි.

කැබිනට් සහ රාජ්‍ය අමාත්‍යවරුන් පත් කිරීමට පෙර දිස්ත්‍රික් සම්බන්ධීකරණ කමිටු සභාපතිවරුන් වෙත පත්වීම් ලිපි ප්‍රදානය කිරීමට ජනාධිපතිවරයා කටයුතු කර තිබුනත් අද පත් කළ කැබිනට් සහ රාජ්‍ය අමාත්‍යවරුන්ගේ විෂය පතයන් තුළට සුළු ආගම් ඇතුලත් නොකිරීමට ජනපති අගමැති වග බලාගෙන තිබේ.