ඉතාලි ලාංකිකයෝ ආණ්ඩුවට විරුද්ධව ජාත්‍යන්තරයට යාමට සැරසෙති (VIDEO)

0

පාස්කු ප්‍රහාරය ගැන සාධාරණ පරීක්ෂණයක් කර අපරාධ කරුවන්ට දඩුවම් ලබා දීමට රාජපක්‍ෂ ආණ්ඩුව කටයුතු නොකළහොත් ඊට එරෙහිව ජාත්‍යන්තර ආධාර පතන බවට ඉතාලියේ බොලොඤ්ඤා නගරයට රැස්වූ ලාංකික උද්ඝෝෂකයෝ පවසති.

අගමැති මහින්ද රාජපක්ෂ විදේශ ඇමැති ජී.ඇල් පිරිස් ඇතුළු 15 දෙනකුගෙන් යුත් කණ්ඩායමක් ඉතාලියේ පැවති අන්තර් ආගමික සමුළුවක් සඳහා පැමිණි අවස්ථාවේදී මෙම උද්ඝෝෂණය ඊයේ [12] පැවැත්විණි.

G20 ඉතාලි අන්තර් ආගමික සමුළුව නමින් පැවැත්වෙන මෙම සමුළුව සංවිධානය කරන්නේ G20 Interfaith Forum (IF20) නම් අන්තර්ජාතික රාජ්‍ය නොවන සංවිධානය විසිනි.

`කැරිටාස්` කතෝලික සහනාධාර ආයතනය, `ක්‍රිස්ටියන් ඒඩ්` ක්‍රිස්ත්‍රියානි සහනාධාර සංවිධානය ඇමෙරිකානු ඉස්ලාමීය සහන සංවිධානය සහ ලෝක යුදෙව් කොන්ග්‍රසය මීට මුදල් ආධාර සපයයි.

සියයකට ආසන්න පිරිසක් එක්ව සිටී රාජපක්‍ෂ ආණ්ඩු විරෝධී මෙම උද්ඝෝෂණයේ දී පාස්කු ප්‍රහාරයේ සැබෑ මහ මොළකරුවන් හෙළිදරව් කරන ලෙස අගමැති හා ජනාධිපතිට බලපෑම් කෙරිණි.

එසේ නොවන්නේ නම් පාස්කු ප්‍රහාරය ගැන බෙල්ජියමේ පිහිටි යුරෝපා පාර්ලිමේන්තුවටත්, ස්විස්ටර්ලන්තයේ පිහිටි එක්සත් ජාතීන්ගේ මානව හිමිකම් කාර්යාලයටත් දැනුම් දීමට පියවර ගන්නා බවයි උද්ඝෝෂකයෝ ප්‍රකාශ කළේ.

අගමැති මහින්ද රාජපක්‍ෂ පාප් වහන්සේ හමුවී පාස්කු ප්‍රහාර පරීක්ෂණ ගැන වැරදි තොරතුරු ලබා දෙන බවට අගරදගුරු මැල්කම් රංජිත් කාදිනල් චෝදනා කළේ අගමැති ගේ ඉතාලි සංචාරයට දින කිහිපයකට පෙරාතුවය.

බොලොඤ්ඤා නගරයේ විරෝධතාවයට ඉතාලියේ වෙසෙන ලාංකිකයන්ට අමතරව ජර්මනිය හා එංගලන්තයේ සිට පැමිණි ලාංකිකයන් ද එක්ව සිටී අතර උද්ඝෝෂණය වාර්තා කිරීමට එහි ගිය මාධ්‍ය වාර්තාකරුවන් පවසන්නේ රාජපක්‍ෂ ආණ්ඩුවට හිතවත් පිරිස් පැමිණ ආණ්ඩුව අපහසුතාවයට පත් කරන බව පවසමින් නොසන්සුන් ලෙස හැසුරුණු බවයි.

Facebook Comments

wedding people