අල්ලස් දී පුංචි ආණ්ඩුව ජයගත් මන්ත්‍රී දොට්ට

0

ශ්‍රී ලංකා මැතිවරණ ඉතිහාසයේ සුවිශේෂී අවස්ථාවක් සනිටුවහන් කරමින් ඡන්ද දායකයන්ට අල්ලස් දී පසුගිය පළාත් පාලන මැතිවරණය ජයගත් අපේක්ෂකයෙකු මන්ත්‍රී ධුරයෙන් ඉවත් කර තිබේ.

පැෆ්රල් සංවිධානය විසින් මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය එක්ව පැවරූ නඩුවක තීන්දුව ප්‍රකාශයට පත් කරමින් 13 වන සඳුදා අදාළ මන්ත්‍රීවරයා ධුරයෙන් ඉවත් කිරීමට මොනරාගල මහාධිකරණ විනිසුරු රංග දිසානායක නියෝග කර ඇත.

අල්ලස් ලබාදී ජයග්‍රහණය කළ අපේක්ෂකයා පළාත් පාලන මන්ත්‍රී ධුරයෙන් ඉවත් කළ අතර ඊළඟ වැඩිම ඡන්ද ලබාගත් අපේක්ෂකයා පත්කරන ලෙස අධිකරණය නියෝග කළ බවයි මේ සම්බන්ධව නිවේදනයක් නිකුත් කරන පැෆ්රල් සංවිධානය පවසන්නේ.

මෙම ඓතිහාසික නඩු තීන්දුව මගින් අනාගතයේ අපේක්ෂකයන් ඡන්ද දායකයන්ට අල්ලස් ලබාදීමට නොපෙළඹෙනු ඇති බවටයි එම සංවිධානය විශ්වාසය පළ කරන්නේ.

යම් හෙයකින් එසේ කලද ඕනෑම අවස්ථාවක ඔවුන්ගේ මන්ත්‍රී ධුරය අභියෝගයට ලක්කිරීමට ඉඩකඩ සැලසෙනු ඇති බව ඔවුන් නිකුත් කල නිවේදනයක සඳහන් කර තිබේ.

මෙම ජයග්‍රහණය සඳහා අවශ්‍ය තොරතුරු ලබාගැනීමට හැකිවූයේ තොරතුරු දැනගැනීමේ පනත ක්‍රියාත්මකවීම හේතුවෙන් බව එම නිවේදනයේ සඳහන්.

අපේක්ෂක වියදම් සීමාකිරීමේ නීති සම්පාදනයේ අවශ්‍යතාවය හා මැතිවරණයකදී සමබිමක අවශ්‍යතාවය නැවත වරක් අවධාරණය වී ඇති බවද පැෆ්රල් සංවිධානය සිය නිවේදනයේ වැඩිදුරටත් සඳහන් කර ඇත.

 

Facebook Comments