රාජපක්ෂ පාලනය වෙනුවට තවත් ආණ්ඩුවක් පත් කරගැනීමට කාදිනල් සැරසෙයි

0

යහපාලන ආණ්ඩු සමයේ පුපුරා ගිය පාස්කු බෝම්බ මාලාව සම්බන්ධයෙන් යුක්තිය ඉටුකරවා ගැනීම සඳහා වර්තමාන පාලකයන් බලයට ගෙන ඒමට කැපවී කටයුතු කළ ශ්‍රී ලංකාවේ පැවිදි කතෝලික නායකත්වය එම අරමුණම ඉෂ්ට කරවා ගැනීම සඳහා තවත් රජයක් පත් කරගැනීමට බලාපොරොත්තු වෙයි.

පාස්කු ප්‍රාහරය වෙනුවෙන් යුක්තිය ඉටුකිරීමට රජය ලබාදුන් පොරොන්දු කිසිවක් ඉෂ්ඨකර නැති බව පැහැදිළිව ප්‍රකාශ කරන කොළඹ අගරදගුරු කාදිනල් මැල්කම් රංජිත් ඉදිරියට බලයට පත්වන රජයකින් හෝ අපේක්‍ෂා කරන යුක්තිය ඉටුවන තුරු බලා සිටින්නට සිදුවෙන බව ප්‍රකාශ කරයි.

“වත්මන් රජය සහ නීතිපති දෙපාර්තමේන්තුව ගැන කිසිම විශ්වාසයක් නැහැ. පාස්කු ප්‍රාහරය වෙනුවෙන් යුක්තිය ඉටුකිරීමට රජය අපිට දුන්නු පොරොන්දු එකක්වත් ඉෂ්ඨකර නැති බව අපි පැහැදිළිව ප්‍රකාශ කරනවා. මේ ආකාරයෙන් මේ රජයෙන් අපට සත්‍ය දැනගන්න, යුක්තිය ඉටුකරගන්න නොහැකි වෙනවා. ඒ නිසා, ඉදිරියට එන්න තිබෙන රජයකින් හෝ අපි අපේක්‍ෂා කරන යුක්තිය ඉටුවන තුරු බලාසිටින්නට අපිට සිදුවෙනවා.” යැයි අගරදගුරුවරයා සඳහන් කරයි.

ඔහු මෙසේ ආණ්ඩුවට සිය අප්‍රසාදය පළ කළේ 2019 පාස්කු ඉරිදා බෝම්බ ප්‍රහාරය සම්බන්ධයෙන් චෝදනා 855කට චෝදනා ලැබ සිටි හිටපු ආරක්ෂක ලේකම් හේමසිරි ප්‍රනාන්දු සහ හිටපු පොලිස්පති පූජිත් ජයසුන්දර එම නඩුව අධිකරණය විසින් නිදොස් කොට නිදහස් කිරීමේ පුවත සම්බන්ධයෙන් ප්‍රතිචාර දක්වමින්ය.

“මෙි ත්‍රස්ත ප්‍රහාරයට පදනම් වෙච්ච සියලු දෙනා පිළිබඳ සොයා බලන්නට අපි ඉතාමත් ම ලොකු උනන්දුවකින් කටයුතු කළේ එදා ඒ ප්‍රහාරයෙන් පසුව, අපේ ජනතාව සන්සුන් කරලා යුක්තිය ඉෂ්ට කිරීම, අපේ දෙවුර මතට ගත් නිසයි. එදා එවැනි පියවරක් නොගත්තේ නම් ඉතාම භයානක තත්ත්වයේ කලබලයක් ලංකාව තුළ නිර්මානය වෙන්නට හැකියාව තිබුණා. අපි ඒ තත්ත්වය පාලනය කළේ අපි ආගම් අදහන නිසාත්, අපේ ආගමික චින්තනයට අනුව පහරට පහර දීම සුදුසු ක්‍රියාදාමයක් නොවන නිසායැ,” යි කාදිනල් රංජිත් අවධාරණය කරයි.

“වත්මන් ආණ්ඩුව බලයට පැමිනීමට පෙර පාස්කු ප්‍රහාරය වෙනුවෙන් යුක්තිය ඉටුකරුනු ඇති බවට ලබාදුන්න පොරොන්දු ඉටුකිරීම සඳහා බුද්ධි අංශවල නිළධාරීන් , රාජ්‍ය ආයතන සහ පොලිසිය විසින් සහය ලබාදෙයි කියා බලාපොරොත්තු වු නමුත් සිද්ධියෙන් පසුව වසර තුනකුත් නිමවන්නට ආසන්නව තිබිය දී ද එවැනි යුක්තියක් ඉටු කළේ නැහැ.“

“ප්‍රහාරය පිටුපස සෘජුව මුස්ලිම් අන්තවාදින් සිටිය ද බුද්ධි අංශවල නිළධාරින්, පොලීසියේ උසස් නිළධාරින් මෙම ප්‍රහාරය සිදුවන බව හොඳින් දැන සිටියා. ඒ පිළිබඳව සාක්‍ෂි අපි ලග තිබෙනවා. විශේෂයෙන් ජනාධිපති කොමිෂන් සභා වාර්තාවෙි මේ පිළිබඳව පැහැදිළිව සඳහන් කර තිබෙනවා,”යැයි මැල්කම් රංජිත් අගරදගුරු කියයි.

පාස්කු ප්‍රහාරයෙන් හානිපත් වූවන්ට යුක්තිය ඉටු නොවීම සම්බන්ධයෙන් නීතිපාහි දෙපාර්තමේන්තුවද කතෝලික නායකත්වයේ විවේචනයට ලක්වී තිබේ.

“කොමිෂන් සභා වාර්තාව මගින්, යම් යම් පුද්ගලයන් මේ ප්‍රහාරය පිළිබඳව දැනසිටි බවට සහ එය වැළැක්වීමට කිසිම පියවරක් නොගත් බැවින් ඒ පුද්ගලයන්ට විරුද්ධව නීතිමය වශයෙන් කටයුතු කරන්න කියා දන්වා සිටිය දී, නීතිපති සහ නීතිපති දෙපාර්තමේන්තුවේ වැරදි හැසිීරීම නිසා යුක්තිය ඉටුනොවන තත්ත්වයක් ඇතිවී තිබෙනවා,” යැයි පවසන කාදිනල්වරයා ඒ ගැන තමන් බලවත් සේ කණගාටුවෙන බව සඳහන් කරයි.

හිටපු ආරක්ෂක ලේකම් සහ හිටපු පොලිස්පති අධිකරණය විසින් නිදොස් කොට නිදහස් කිරීම සම්බන්ධයෙන් ප්‍රතිචාර දක්වමින් ප්‍රකාශයක් නිකුත් කරමින්,ශ්‍රි ලංකා මෙතෝදිස්ත සභාවේ හිටපු මහනායක විශ්‍රාමික රදගුරු ආසිරි පී. පෙරේරා පවසන්නේ, මෙම තීරණය සියලු පාර්ශ්වයන් සතුටු නොකරන බවයි.

පාස්කු ප්‍රහාරය සම්බන්ධයෙන් ජාත්‍යන්තර බලවතුන් හමුවේ කරුණු දැක්වීම සඳහා කාදිනල් රංජිත් ප්‍රමුඛ දූත මණ්ඩලයක් ජිනීවා මානව හිමිකම් සමුළුවට සහභාගි වන බව කොළඹින් පල වෙන ජනමාධ්‍යවල දැක්වේ.

ශ්‍රී ලංකාවේ රජයේ නියෝජිත පිරිසට මහාචාර්ය ජී ඇල් පීරිස් නායක්වය දෙන බව විදේශ අමාත්‍යාංශය නිවේදනය කර ඇත.

Facebook Comments

wedding people