දිවිනැඟුම අරමුදලේ මුදල් සාවද්‍ය ලෙස පරිහරණය කළ බවට චෝදනා කරමින් නීතිපති විසින් ගොනුකළ නඩුවට අදාළව ගොණු කර ඇති චෝදනා නැවත ගොණු කරන තුරු හිටපු ආර්ථික සංවර්ධන අමාත්‍ය බැසිල් රාජපක්ෂ සහ සමෘද්ධි අරමුදලේ හිටපු අධ්‍යක්ෂ ජනරාල් කිත්සිරි රණවක යන විත්තිකරුවන් නිදහස් කිරීමට කොළඔ මහාධිකරණය තීරණය කර ඇත.
අදාළ නඩුව අද (06) කැඳවූ අවස්ථාවේදී නීතිපතිවරයා වෙනුවෙන් රජයේ නීතිඥවරයා විසින් මෙම අධිචෝදනා පත්‍ර අද කොළඹ මහාධිකරණය හමුවේ ඉල්ලා අස්කර ගෙන ඇති අතර ගොනුකරන ලද අධිචෝදනා පත්‍රවල තාක්ෂණික දෝෂයක් පවතින බැවින් නැවත නඩු පැවරීමේ බලාපොරොත්තුවෙන් ඒවා ඉවත්කර ගැනීමට අවසර ලබාදෙන ලෙස නීතිඥවරයා ඉල්ලීමක් කළේය.
එම ඉල්ලීම පිළිගත් මහාධිකරණ විනිසුරු පත්මිණී එන්. රණවක එම අධිචෝදනා ඉවත්කර ගැනීමට අවසර ලබා දුන් බවයි සිලෝන් ජර්නල්ස් අධිකරණ වාර්තාකරු කියා සිටියේ.
වෛද්‍ය ප්‍රතිකාර ලබා ගැනීමට ඇමරිකාවට යාම සඳහා බැසිල් රාජපක්ෂ විසින් අධිකරණයෙන් අවසර ඉල්ලා තිබු අතර අද දිනියේදී එයට අවසර හිමි වී ඇත.
පසුගිය ජනාධිපතිවරණ සමයේ දිවිනැඟුම අරමුදලෙන් රු. ලක්ෂ 290ට අධික මුදලක් යොදවාගෙන ලිත් ලක්ෂ 50ක් මුද්‍රණය කිරීමට පියවර ගැනීම තුළින් එම අරමුදල් සාවද්‍ය ලෙස පරිහරණය කළ බවට නීතිපතිවරයා විසින් මොවුන්ට එරෙහිව අධිචෝදනා ගොනුකර තිබුණි.
Facebook Comments
