දෙමළ මාධ්‍යවේදීන් ඉලක්ක කරගනිමින් උතුරේ දියත් වු රාජ්‍ය මර්දනය හා ප්‍රචණ්ඩත්වය දකුනේ සිංහල මාධ්‍යවේදීන් වෙතටද දිගු වී ඇති බවට අනතුරු අගවන වන්නියේ මාධ්‍ය සංවිධානයක් තරිඳු උඩුවරගෙදර මාධ්‍යවේදියා අත් අඩංගුවට ගැනීම ම්ලේච්ඡ ක්‍රියාවක් ලෙස තරයේ හෙලා දැක තිබේ.
මාධ්‍යවේදී තරිඳු උඩුවරගෙදර අත් අඩංගුවට ගැනීම තවත් ආකාරයේ මර්දනයක් බව පෙන්වා දෙන මුලතිව් මාධ්‍ය සමාජය අවධාරණය කරන්නේ පැවති ආණ්ඩු හැමෙකක්ම දිගින් දිගටම මාධ්‍ය මර්දනයේ යෙදීම නොකඩවාම සිදුකරමින් සිටින බවයි.
දෙමළෙන්, සිංහලෙන් සහ ඉංග්‍රීසියෙන් මුලතිව් මාධ්‍ය සමාජය ජුලි 30 වැනිදා නිකුත් කළ නිවේදනයකින් මගින් සිහි ගන්වා ඇත්තේ යුද්ධය නිමාව දුටු කාල සීමාව වන විට අවම වශයෙන් සිය වෘත්තිය සගයන් 39 ක පිරිසක් අතුරුදහන් හෝ මරා දමා ඇති ආකාරයයි.
” ඒ අනුව ගත් කල, විශේෂයෙන්ම යුද්ධය හමාරවූ 2009 දක්වා වූ සටන් සමය තුල මර්දනය සහ රාජ්‍ය ප්‍රචණ්ඩත්වය හේතුකොටගෙන අපේ මාධ්‍යවේදීන් 39 දෙනකු එක්කෝ මරා දමන ලදී; නැතහොත් අතුරුදහන් කර දමන ලදී. අපි තවමත් ඔවුන් වෙනුවෙන් යුක්තිය ඉල්ලා සටන් වදිමින් සිටිමු. ”
යුද්ධය අවසන් වී තිබුනද, මේ පසුබිමේ දෙමළ මාධ්‍යවේදීන් ඉලක්ක කොටගත් මර්දනය හා ප්‍රචණ්ඩත්වය දැන් සිංහල මාධ්‍යවේදී සහෝදරයන් වෙතටද දිගු වී ඇති බව මුලතිව් මාධ්‍ය සමාජයේ සභාපති ෂන්මුගම් තවසීලන්ගේ අත්සනින් නිකුත් කළ නිවේදනයේ සදහන්ය.
” මෙය ‘අරගලය’ සමයේ තීව්‍ර කෙරුණු අතර ඉන් අනතුරුව උතුරු නැගෙනහිර දෙමළ මාධ්‍යවේදීන්ට සේම දකුණේ සිංහල සහෝදර මාධ්‍යවේදීන්ටද එරෙහිව අඛණ්ඩව දියත් වෙමින් පවතී. ”
පොලිසිය විසින් මාධ්‍යවේදී තරිඳු උඩුවරගෙදරට පහර දීම සහ අත් අඩංගුවට ගැනීම එම මර්දනයේ තවත් එක ස්වරූපයක් බවයි මුලතිව් මාධ්‍ය සමාජය පවසන්නේ.
වෘත්තීය සමිති විසින් ඒකාබද්ධව සංවිධානය කරන ලද විරෝධතාවක තොරතුරු රැස් කරමින් සිටියදී නිදහස් මාධ්‍යවේදියකු සහ ශ්‍රී ලංකා තරුණ ජනමාධ්‍යවේදීන්ගේ සංගමයේ සාමාජික තරිඳු උඩුවරගෙදර 2023 ජුලි 28 දා පොලීසිය විසින් අඩංගුවට ගන්නා ලදී. මුලතිව් මාධ්‍ය සමාජය පවසන්නේ මෙම අත්අඩංගුවට ගැනීම අහම්බයක් නොවන බවයි.
“අපි මෙය අහම්බ සිද්ධියක් ලෙස නොදකිමු. තරිඳු උඩුවරගෙදර අත් අඩංගුවට ගන්නා ලද්දේ ම්ලේච්ඡ ලෙස පහර දීමෙන් අනතුරුවය. මෙය පොලිසියේ සැලසුම් සහගත ප්‍රහාරයකි.”
ආරක්ෂක අංශ සහ බලයේ ඉන්නා පිරිස් මාධ්‍යවේදී උඩුවරගෙදරට දිගින් දිගටම බාධා කිරීම නිසා ශ්‍රී ලංකාවේ මාධ්‍ය නිදහස නැවත නැවතත් ප්‍රශ්න කිරීමට ලක් වී ඇති බව මුලතිව් මාධ්‍ය සමාජය තව දුරටත් නිවේදනය කර ඇත.
පොලිසිය විසින් පහරදී අත් අඩංගුවට ගන්නා ලද මාධ්‍යවේදියා අධිකරණ වෛද්‍ය නිලධාරියකු වෙත ඉදිරිපත් කර තිබුනේ පැය කිහිපයකට පසුව ය.
අධිකරණ වෛද්‍ය නිලධාරි නිර්දේශ පරිදි මාධ්‍යවේදියා කොළඹ ජාතික රෝහලේ හදිසි අනතුරු වාට්ටුවට ඇතුල් කර තිබුනි. රෝහල් ගතකර තිබුනේ ඔහුගේ දෑතටම මාංචු ලා තිබියදීය.
මාධ්‍යවේදියකුට පහර දීමෙන් නොනැවතී පොලිසිය විසින් ඔහුගේ නිදහස පිළිබඳ මූලික අයිතිවාසිකම් දිගින් දිගටම උල්ලංඝනය කිරීම මුලතිව් මාධ්‍ය සමාජය සිය නිවේදනය මගින් දැඩි ලෙස හෙලා දැක ඇත.
Facebook Comments
