‘ද නේෂන්’ පුවත්පතේ හිටපු සංස්කාරවරයෙක් වශයෙන් සේවය කළ ජේෂ්ඨ මාධ්‍යවේදී කීත් නෝයර් පහරදීමේ සිද්ධිය සම්බන්ධයෙන් සැකපිට යුධ හමුදා බුද්ධි අංශයේ මේජර්වරයෙකු හා සාජන්වරු දෙදෙනෙකු අත්අඩංගුවට පත්ව ඇත.
අපරාධ පරීක්ෂණ දෙපාර්තමේන්තුවේ විශේෂ විමර්ශන කණ්ඩයාමක් විසින් ඊයේ (17) මෙම සැකකරුවන් අත්අඩංගුවට ගෙන ඇති බවටයි වාර්තා වන්නේ.
උතුරේ යුද්ධය උත්සන්ව පැවති 2008 සමයේ කතෘවරයා පැහැරගැනීමට ලක් වු අතර පැහැර ගෙන ගොස් පහරදී දින 3 පසුව ඔහු දෙහිවල සිය නිවස අසල දමා ගොස් තිබුණි.
එම සිද්ධියෙන් පසු සිය ජිවිත ආරක්ෂාව පතා කීත් නෝයර් ඕස්ට්‍රේලියාව බලා ගිය අතර එහිදී දේශපාලන රැකවරණ ලබාගෙන මේ වන විට එහි ජීවත් වෙමින් සිටී.
පසුගිය දා අපරාධ පරීක්ෂණ දෙපාර්තමේන්තුවේ නිලධාරීන් විසින් සිද්ධිය සම්බන්ධව ඔහුගෙන් ප්‍රකාශයක් සටහන් කර ගෙන තිබු අතර ඉන් පසුවයි මෙම අත්අඩංගුවට ගැනීම සිදු කර ඇත්තේ.
රහස් පොලිසිය විසින් මෙසේ අත්අඩංගුවට ගනු ලැබුවේ යුධ හමුදා බුද්ධි අංශයේ මේජර් බුලත්වත්ත හා සාජන් පෙරේරා හා තවත් අයෙක් බවයි පොලිසිය පවසන්නේ.
Facebook Comments
