ලක් රජය සමස්ත පාර්ලිමේන්තුවම ආණ්ඩුක්‍රම ව්‍යවස්ථා සභාවක් බවට පත්කරමින් නව ව්‍යවස්ථාවක් කෙටුම්පත් කිරීමේ ක්‍රියාවලිය මේ වනවිට ආරම්භකර ඇති බව නීතිය හා සාමය සහ දක්ෂිණ සංවර්ධන අමාත්‍යවරයා පවසයි.
බලය විමධ්‍යගත කිරීම, සුළු ජාතික අයිතීන් තහවුරු කිරීම පිළිබඳව එහිදී දීර්ඝ වශයෙන් සාකච්ජාවට ලක්වන බවයි අමාත්‍ය සාගල රත්නායක පවසන්නේ.
ඉන්දියාවේ නවදිල්ලි නුවරදී පසුගිය 14 වැනිදා ආරම්භ වූ තුන්වන ත්‍රස්තවාදය වැළක්වීමේ සමුළුවට එක්වෙමින් ඔහු ඒ බව සදහන් කර තිබේ.
ඉන්දියානු පදනම විසින් සංවිධානය කර තිබු සමුලුවේදී අමාත්‍යවරයා වැඩි දුරටත් පවසා ඇත්තේ ශ්‍රී ලංකාවේ හෝ කලාපය මත බලපෑමක් ඇතිකළ හැකි ඕනෑම ආකාරයේ ජාත්‍යන්තර ත්‍රස්තවාදයක් පිළිබඳව අවදියෙන් සිටින බවයි.
එම සමුළුවට ඉන්දීය උප ජනාධිපති හමීඩ් අන්සාරි, නේපාල උප අගමැති බිම්ලේන්ද්‍ර නිධි, සිංගප්පූරු ස්වදේශ කටයුතු අමාත්‍ය කේ.ශන්මුගම් ඇතුලු කලාපීය නායකයන් රැසක් ද එක්ව ඇත.
දොළොස් දහසක් පමණ වන හිටපු එල්ටීටීඊ සාමාජිකයන් පුනරුත්ථාපනය කිරීමට ලක් රජය සමත්වූ බවද පවසා ඇති අමාත්‍යවරයා ඉන් බොහෝ පිරිසක් ඊළඟට පැවැත්වෙන මැතිවරණ සඳහා තරග කිරීමට දේශපාලන පක්ෂ පිහිටුවාගනිමින් ප්‍රජාත්‍රන්ත්‍රවාදී ප්‍රවාහයට එක්වෙමින් සිටින බව ද පවසා තිබේ.
අග්‍රාමාත්‍ය රනිල් වික්‍රමසිංහ මෙම සමුළුවේ සමාරම්භක සැසිය ස්කයිප් තාක්ෂණය ඔස්සේ ඇමතා ඇති අතර ශ්‍රී ලංකාව නියෝජනය කරමින් විපක්ෂ නායක ආර්. සම්බන්ධන්ද මෙම සමුළුවට එක්ව ඇත.
Facebook Comments
