සංහිඳියාව කියා හමුදාවට අත නොතබන බව මෙන්ම සංහිඳියාව යනු ජාතික ආරක්ෂාව තහවුරු කරමින් නැවත යුද්ධයක් ඇති වීම වැළැක්වීම බව සංහිඳියා කාර්යංශයේ සභාපතිනිය පෙන්වා දෙයි.
විවිධ ජාතීන්ට හා ආගම් වලට අයත් ජන කොටස් එකට එක් කර රට ඉදිරියට ගෙන යාමට හැකි වුවහොත් නැවත රට දෙකඩ කිරීමට කිසිවෙක් ඉදිරිපත් නොව බවට හිටපු ජනපතිනි චන්ද්‍රිකා බණ්ඩාරණායක විශ්වාසය පල කර සිටියේ සංහිඳියාව සහ සහජීවනය පිළිබඳව ජාතික ප්‍රතිපත්තිය එළිදැක්විමේ මාධ්‍ය හමුවේදීය.
මෙතෙක් පැවති කිසිඳු රජයක් සංහිඳියාව ඇති කිරීමට පියවර නොගත් බවට චෝදනා කළ හිටපු ජනාධිපතිනිය මෙයින් සිදු වන්නේ ජාතික ආරක්ෂාව තහවුරු වීම බවයි ඇය අවධාරණය කර සිටියේ.
හමුදා භටයන් අත්අඩංගුවට ගන්නේ ඇයි?
හමුදාව භටයන් අත්අඩංගුවට ගැනීම සම්බන්ධව මෙහිදී මාධ්‍යවේදීන් හිටපු ජනපතිනියගෙන් ප්‍රශ්න කර සිටි අතර හමුදා සෙබලුන් අත් අඩංගුවට පත්වුයේ යුද්ධයෙදී සිදු කළ කිසිවක් නිසා නොවන බව කී සංහිඳියා කාර්යංශයේ සභාපතිනිය ඔවුන් අත්අඩංගුවට පත් වුයේ හිටපු රජයේ ප්‍රධානීන් සමඟ මිනී මැරුම් වලට සම්බන්ධ වු නිසා බවටයි කියා සිටියේ.
“යුද්දෙ වැරදියට කෙරුව හරි හරියට කෙරුව හරි කියල අත්අඩංගුවට අරන් නැහැනෙ හමුදා භටයින් අත්අඩංගුවට ගන්නෙ පහුගිය රජයේ ප්‍රධානින් එක්ක එකතු වෙලා විශේෂයෙන්ම ආරක්ෂක අමාත්‍යංශයේ ප්‍රධානින් එක්ක එකතු වෙල ඕගොල්ලන්ගෙ මාධ්‍යවේදි සහෝදරවරු මහ පාරවල් ගාණේ මරල දැම්ම නිසා” යැයි හිටපු ජනපතිනිය පැවසීය.
උතුරේ සිදුවිමේ නිසා හමුදා භටයින් අත්අඩංගුවට පත්වී නැති බව අවධාරණය කළ චන්ද්‍රිකා බණ්ඩාරණායක හිටපු ජනපතිනිය එක්නැළිගොඩ අතුරුදහන්වීම හා ලසන්ත වික්‍රමතුංග වැනි දකුණේ ඝාතනයන්ට ඔවුන් අත්අඩංගුවේ පසු වන බව කියා සිටියේය.
පසුගිය රජයේ “ආරක්ෂ ලේකම් සහ හිටපු ආරක්ෂක ලොක්කන්” අහිංසක හමුදා භටයින් යොදා ගනිමින් තම දේශපාලන විරුද්ධවාදීන් මරා දැමු බවට ඇය දැඩිව කියා සිටි අතර එවැනි වැරදි කළවුන් “අනේ පවු සොල්දාදුවන්” කියා අහක බලා සිටිය හැකි දැයි ප්‍රශ්න කළාය.
Facebook Comments
