ජනාධිපතිවරයා තෙවැනි වතාවට එක්සත් ජාතීන්ගේ මහා මණ්ඩලය ඇමතීමට යාමට දිනකට පෙර අතුරුදහන් වුවන් පිළිබද වු කාර්යාලය ක්‍රියාත්මක කරවීමට පියවර ගෙන තිබේ.
ජනපති යටතේ ඇති ජාතික ඒකාග්‍රතා සහ සංහිඳියා අමාත්‍යංශය යටතේ සැප්තැම්බර් 15 දා සිට OMP කාර්යාලය ක්‍රීයාත්මක කිරිමේ ගැසට් පත්‍රයට ජනපති අත්සන් තබා ඇත.
වෙනම අමාත්‍යවරයකු පත් නොකර ජනාධිපති වරයාම OMP කාර්යාලය බාරගැනීම ව්‍යවස්ථා විරෝධී පියවරක් ලෙසින් ජාත්‍යන්තර නීතිවේදීන්ගේ කමිටුවේ (ICJ) දෝෂ දර්ශනයට ලක්වී තිබුනි.
යහපාලන රජය දුන් පොරොන්දු ඉටු කරවා ගැනීමට ජාත්‍යන්තර සමුළුවක් එන තුරු බලා සිටීමට සිදුවන බව මින් පැහැදිලි වන බවට අතුරුදහන් වුවන්ගේ පවුල් එකතුවේ සභාපතිවරයා චෝදනා කරයි.
මාර්තු මාසයේ පැවැත්වීමට නියමිත ජිනිවා මානව හිමිකම් සමුළුට පෙර රජය මානව හිමිකම් සම්බන්ධයෙන් ලබා දුන් කිසිඳු පොරොන්දුවක් ඉටු නොවනු ඇති බවටයි බ්‍රිටෝ ප්‍රනාන්දු සැක පල කරන්නේ.
සහනයක්
ජනාධිපතිවරයා යටතේ අතුරුදහන් කාර්යාලය ක්‍රියාත්මක කිරිම ව්‍යවස්ථා විරෝධි බවට ඇතැමුන් තර්ක කල ද දිර්ඝ කාලයක් තිස්සේ වේදනා විඳි ජනයාට මෙය සහනයක් වනු ඇති බවයි ඔහු පෙන්වා දෙන්නේ.
යුද පීඩිත ජනතාවට යුක්තිය ඉටු කිරීම සම්බන්ධයෙන් දී ඇති ප්‍රතිඥා ඉටු නොකරන්නේ නම් ජාත්‍යන්තර අධිකරණයක් හමුවට ශ්‍රී ලංකාව ගෙනයාම අත්‍යාවශ්‍ය බව එක්සත් ජාතීන්ගේ සංවිධානය අනතුරු අඟවා තිබුණි.
නීති ගත කොට වසරකට වැඩි කලක් ගතවී ඇති අතුරුදහන් වූවන් පිලිබඳ කාර්යාලය (OMP) වහාම ක්‍රියාත්මක කරන ලෙස සෙයිඩ් කුමාරයා 36 වැනි මානව හිමිකම් සමුළුවේ සමාරම්භක දේශනය පවත්වමින් ඉල්ලා සිටියේය.
Facebook Comments
