බැඳුම්කර නිකුතුව පිළිබද ජනාධිපති පරික්ෂණ කොමිසන් සභාවේ වාර්තාව හරහා යහපාලන ජාතික ආණ්ඩුවේ ප්‍රජාතන්ත්‍රවාදී සහ නීතිගරුක පිළිවෙත යළිදු තහවුරු වන බව පවසන අග්‍රාමාත්‍ය කාර්යාලය නීතිපති දෙපාර්තමේන්තුව විසින් එම වාර්තාවට අදාළව සුදුසු ඉදිරි ක්‍රියා මාර්ග ගනු ඇතැයි විශ්වසය පල කරති.
පාර්ලිමේන්තු මන්ත්‍රී සුනිල් හදුන්නෙත්තිගේ සභාපතිත්වයෙන් යුතු කෝප් කමිටුව විසින් බැඳුම්කර නිකුතුව පිළිබද සිදුකල පරීක්ෂණ වාර්තාව 2016 ඔක්තෝබර් 31 වැනිදා අගමැතිවරයාගේ නීතිපතිවරයා වෙත යොමු කල බව සිහිපත් කරන අග්‍රාමාත්‍ය කාර්යාලය එම වංචාව සම්බන්ධ වගකිවයුතු අයවලුන්ට ගත යුතු නෛතික පියවර පිළිබදව ද නිර්දේශ ඉදිරිපත් කරන ලෙස 2016 දෙසැම්බර් මාසයේදී අගමැතිවරයා විසින් නීතිපතිවරයාගෙන් ඉල්ලා සිටි බව පවසයි.
බැඳුම්කර නිකුතුව සම්බන්ධ සුදුසු නෛතික පියවර ගැනීමේ වගකීම 2016 වසරේ දෙසැම්බරය වන විට අගමැතිවරයා විසින් ද 2018 ජනවාරි වන විට ජනාධිපතිවරයා විසින් ද නීතිපති දෙපාර්තමේන්තුවට පවරා ඇති බවයි එම නිවේදනයේ පෙන්වා දෙන්නේ.
එසේම කොමිසම විසින් සඳහන් කළ පරිදි 2008 වසරේ සිට සිදුවූ දූෂණ සහ අක්‍රමිකතා පිළිබඳව නිසි පරීක්‍ෂණයක් සිදු කොට, නීතිමය ක්‍රියා මාර්ග ගැනීමද යහපාලන ජාතික ආණ්ඩුවේ අභිප්‍රාය බව පවසන අග්‍රාමාත්‍ය කාර්යාලය පසුගිය ආණ්ඩු කාලයේ ක්‍රියාත්මක වූ ද්වේශ සහගත අසත්‍ය අවලාද හා මඩ ගැසීමේ සම්ප්‍රදාය වෙනුවට නීතියේ හස්තයට කිසිදු බලපෑමකින් තොරව ක්‍රියාත්මක වීමට අවකාශ සැලසීම යහපාලන රජයේ අභිලාෂය බව ද වැඩි දුරටත් කියා සිටි.
Facebook Comments
