ප්‍රජාතාන්ත්‍රිකව තේරී පත්වූ ප්‍රථම සහ හිටපු මාලදිවයින් ජනපති මොහොමඩ් නෂීඩ් සහ අනෙකුත් විපක්ෂ නායකයන් වහාම මුදා හරින ලෙස එරට ශ්‍රේෂ්ඨාධිකරණයක් තීන්දු කර තිබේ.
එසේම පෙර පැවැත්වුණු නඩු විභාගය ආණ්ඩුක්‍රම ව්‍යවස්ථාව සහ ජාත්‍යන්තර නීති කඩ කර ඇති බැවින් නැවත එය විභාග කරන ලෙසත් 1 බ්‍රහස්පතින්දා ලබා දුන් අධිකරණ තීන්දුවේ සඳහන් වේ.
දුෂිත පාලනය, මානව හිමිකම් කඩකිරීම සහ දුෂණ වංචා යන චෝදනා මත ජනපති අබ්දුල්ලා යමීන් තාවකාලිකව ඉවත් කර ඔහුට එරෙහි චෝදනා විමර්ශනය කරන ලෙස ඉල්ලා විරුද්ධ පක්ෂ ශ්‍රේෂ්ඨාධිකරණය වෙත පෙත්සමක් ඉදිරිපත් කිරීමෙන් පසුව මෙම තීන්දුව ලැබී ඇත.
පෙත්සම සඳහා මොහොමඩ් නෂීඩ් මෙන්ම ඔහුට පෙර ජනපති ධුරය දැරූ මෞමුන් අබ්දුල් ගයුම් ද අත්සන් තබා ඇත.
උසාවි තීන්දුව ප්‍රකාශයට පත් කිරීමෙන් අනතුරුව විපක්ෂ ආධාරකරුවන් ප්‍රීති උත්සව පවත්වා ඇති අතර මාලේ අගනුවරට රැස් වූ ආධාරකරුවන් විසිරුවා හැරීම සඳහා පොලිසිය කඳුළු ගෑස් ප්‍රහාර එල්ල කර තිබේ.
මාලදිවයින් හිටපු ජනපති මොහොමඩ් නෂීඩ් වෙත 2015 දී “ත්‍රස්තවාදී” චෝදනා එල්ල කර තිබුණි.
ඒ ඔහුගේ පාලන කාලය තුලදී විනිසුරුවරයකු අත්අඩංගුවට ගැනීමේ සිදුවීමකට අදාලව ය.
එම චෝදනා වලට වරදකරු වූ මොහොමඩ් නෂීඩ් හට වසර 13 ක සිර දඬුවම් හිමි විය.
Facebook Comments
