ඒඩ්ස් බියක් නිසාවෙන් පාසලට ඇතුලු වීමට නොහැකි වු කුලියාපිටියේ සිසුවා හට අධ්‍යාපන අමාත්‍යාංශයේ සහයෝගය දිගටම හිමි වන බව අමාත්‍යංශය පවසයි.
මේ වන විට මහනුවර ත්‍රිත්ව විද්‍යාලයේ අධ්‍යාපනය හදාරන කුලියාපිටියේ දරුවා පදිංචිව සිටින කුලී නිවසේ ඉදිරි වසර සඳහා කුලී මුදලට අදාළ චෙක්පත අබාන්ස් ආයතනය විසින් අධ්‍යාපන අමාත්‍ය අකිල විරාජ් කාරියවසම් වෙත ලබා දී තිබේ.
ඇතැම් පළාත් අධ්‍යාපන බලධාරීන්ගේ නොසැලකිල්ල සහ වගකීමකින් තොර ක්‍රියාකලාප හේතුවෙන් අසාධාරණයට ලක් වූ මෙම සිසු දරුවාගේ අධ්‍යාපන කටයුතු බාධාවකින් තොරව පවත්වාගෙන යාමට අවශ්‍ය කටයුතු සිදුකිරීමට අධ්‍යාපන අමාත්‍ය අකිල විරාජ් කාරියවසම් සෘජුවම මැදිහත් වු බවයි අධ්‍යාපන අමාත්‍යංශය නිවේදනය කරන්නේ.
සිසු දරුවාගේ ඉදිරි අධ්‍යාපන කටයුතු සාර්ථකව සිදු කර ගෙන යාම සඳහා පාසලක් ලබාදීමටත් පාසල ආසන්නයෙන්ම නිවසක් ලබාදීමටත් අධ්‍යාපන අමාත්‍යාංශය පියවර ගනු ලැබුවේ අධ්‍යාපන අමාත්‍යවරයාගේ උපදෙස් මත බවයි අධ්‍යාපන අමාත්‍යංශය පෙන්වා දෙන්නේ.
දරුවා ජිවත් වන නිවසේ කුලී මුදල 2016 වසරේ මාර්තු මාසයේ සිට වාර්ෂිකව ලබාදීමට අබාන්ස් ආයතනය ඉදිරිපත් වී සිටින අතර සමාජ සංවේදී සිදුවීම්වලදී මානුෂීයව මැදිහත්වීම පිළිබඳ පුද්ගලිකවම අබාන්ස් ආයතනයට තමා ස්තූතිවන්ත වන බව අකිල විරාජ් අමාත්‍යවරයා පවසා ඇත.
“HIV ආසාදනය පිළිබඳ අනියත බියක්” හේතුවෙන් අධ්‍යාපනය කඩාකප්පල් වූ කුලියාපිටිය දරුවා සම්බන්ධව පසුගිය වකවානුවේ සමාජය තුළ වැඩි අවධානයක් යොමු වී තිබුණි.
”මවට එච්අයිවී වෛරසය ශරීර ගත වෙලා නම් පැහැදිලිවම දරුවටත්, මොකද දරුවා නිදා ගන්නේ ඇයගේ ඇකයේ. අපි ඒ ප්‍රදේශයේ නිසා දන්නවා ඒ මව සහ ඒ කටයුතු වෙන ආකාරය. ඒ නිසා තමයි අපි බැලුවේ දරුවාව පරිවාසය භාරයට ගන්න. නමුත් මව ඉඩ දීලා නැහැ.” යි අධ්‍යාපන අමාත්‍ය අකිල විරාජ් එම සිදුවීම සිදු වු වකවානුවේ කියා තිබුණි.
කෙසේ වෙතත් රජය දරුවාට පාසලක් ලබා දීමට අසමත් වු අතර මහනුවර ත්‍රිත්ව විද්‍යාලය ස්ව කැමැත්තෙන් දරුවා එම පාසලට ඇතුලත් කර ගන්නා ලදී.
Facebook Comments
