දශක තුනක පමණ ආසන්න කාලයක් සංශෝධනයට ලක් නොවුන වත්කම් බැරකම් නීතිය සංශෝධනය කිරීම සඳහා කටයුතු කරමින් සිටින බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.
වසර 30ක පමණ කාලයක සිට වත්කම් බැරකම් නීතිය සංශෝධනයකට ලක්ව නොමැති බවයි කොමිසමේ අධ්‍යක්ෂ ජනරාල් ජනාධිපති නීතීඥ සරත් ජයමාන්න පෙන්වා දෙන්නේ.
යම් අයෙකුගේ වත්කම් පිළිබඳ පැමිණිල්ලක් ලැබුණු විට එහි විමර්ශනය සඳහා ප්‍රමුඛ ලේඛන ලෙස සලකනු ලබන්නේ ඔහුගේ වත්කම් බැරකම් ප්‍රකාශනය වන අතර මේ හේතුවෙන් වත්කම් බැරකම් නීතිය යාවත්කාලීන කිරීමේ දැඩි අවශ්‍යතාවක් පවතින බව ජනාධිපති නීතීඥ සරත් ජයමාන්න කියා සිටි.
නව වත්කම් බැරකම් නීතියක් සකස් කිරීම සඳහා වන කැබිනට් අනුමැතිය ද හිමිව ඇති බවයි අධ්‍යක්ෂ ජනරාල්වරයා පවසන්නේ.
වත්කම් බැරකම් ප්‍රකාශ කිරීම සදහා පෙර සිදුකළ අයදුම් පත්‍ර පිරවීම වෙනුවට අන්තර්ජාලය හරහා නව ක්‍රමවේදයක් හඳුන්වාදීමට නියමිත අතර දැනට පවතින නීතියට අනුව වත්කම් බැරකම් ලබා නොදෙන්නෙකුට එරෙහිව නඩු පැවරීම සිදු කළ ද නව සංශෝධනයට අනුව අදාළ පුද්ගලයින්ගේ මාසික වැටුපෙන් මාස්පතා දඩ මුදලක් ලෙස මුදලක් අය කරගැනීමට අපේක්ෂා කෙරේ.
මෙම සියලු කාරණා ආශ්‍රයෙන් රටට හිතැති සක්‍රීය සහ ශක්තිමත් නව වත්කම් බැරකම් නීතියක් සකස් කිරීම සඳහා අවශ්‍ය සියලු ප්‍රතිපාදන සකස් කර ඇති බවයි අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල් ජනාධිපති නීතීඥ සරත් ජයමාන්න වැඩි දුරටත් පෙන්වා දෙන්නේ.
Facebook Comments
