උතුරු යුද්ධයෙන් සිවිල් වැසියන් දහස් ගණනක් මරා දමන ලද බව ෆොන්සේකා පිළිගනී

0

උතුරේ දියත් කල යුද්ධයේ දී සාමාන්‍ය වැසියන් දහස් ගණනක් ඝාතනය වූ බව යුද්ධයට අණදුන් හමුදා ප්‍රධානියා පිළිගෙන තිබේ.

“මාත් හිතනවා උපරිම හාරපන්දාහක් මියයන්නට ඇති,” යයි හිටපු හමුදාපති ෆීල්ඩ් මාර්ෂල් සරත් ෆොන්සේකා කොළඹ පැවති මාධ්‍ය හමුවක දී කියා සිටියේය.

ඒ සා විශාල ජනකායක් මියගියේ එල්ටීටීඊ බංකර් වල සිටීම නිසායයි ප්‍රකාශ කළ ඔහු යුද්ධයේ අවසාන අදියරේදී අඩුම වශයෙන් සාමාන්‍ය වැසියන් හතලිස් දහසක් වත් මරා දමන ලද බවට එක්සත් ජාතීන්ගේ සංවිධානය විසින් දක්වා ඇති සංඛ්‍යාලේඛන තරයේ ප්‍රතික්ෂේප කළේය.

එම ගණන් බැලීම් නිවැරදි නම් “පුදුකුඩිඉරිප්පු, කිලිනොච්චි වගේ පැතිවල හැමතැනම උදලු පාරක් ගැහුවත් හැමතැනම මිනී ඇට කටු තියෙන්න ඕනේ,” යි සරත් ෆොන්සේකා අමාත්‍යවරයා පැවසීය.

හිටපු හමුදාපතිවරයාගේ ගණන් බැලීම් අනුව එල්ටීටීඊ යේ 23,000 ක් යුද්ධයෙන් මියගොස් තිබෙන අතර තවත් දොළොස්දහසක් පුනරුත්තාපනය කර ඇත.

ෆීල්ඩ් මාර්ෂල් සරත් ෆොන්සේකා පවසන පරිදි එල්ටීටීඊ නායක වේලුපිල්ලේ ප්‍රභාකරන්ගේ බිරිය හා දියණියද මියගොස් ඇත්තේ යුද වදිමිනි.

ශ්‍රී ලංකා රජයේ ආරක්ෂක සේනා විසින් උතුරේ දියත් කරන ලද යුද්ධයේ සිදු කරන ලද බවට චෝදනා නැගෙන යුද අපරාධ සහ මානව විරෝධී අපරාධ ඇතුළු මහා පරිමාන මානව හිමිකම් උල්ලංඝන සම්බන්ධයෙන් විදේශීය දායකත්වයද සහිත පරීක්ෂණයක සාක්ෂි දීමට ඉදිරිපත් වීමේ සුදානම හිටපු හමුදාපතිවරයා විසින් කිහිප වාරයක්ම පලකොට තිබේ.

Facebook Comments

wedding people