සිතාරා කුලරත්න යනු වම නියෝජනය කරන ගැහැනියකි. කලක් පූර්ණකාලීන මාධ්‍යකරණයේ නියැලුණු ඇය දැන් සමාජ – දේශපාලන ක්‍රියාකාරිණියක ලෙස අපට සම්මුඛ වෙයි. ඇතැම් තැන වම නමට පමණකි. තව තැනක හම ගැලවුණු වමකි. එවන් පසුබිමක සිතාරා තමන් දකින වම ගැනත්, ඉන් එහා ගිය කාරණා බොහොමයක් පිළිබඳත් අපට මෙසේ කියයි.
#. සිතාරා කුලරත්නට අනූව ‘දේශපාලනය’ කියන්නේ මොකද්ද?
දේශපාලනය කියන්නේ තමන් අවට වෙන්නෙ මොනවද, එහෙම වෙන්නෙ ඇයි කියන එක තේරුම් ගැනීම. ඒ දේවල් බහුතරයකගේ යහපත සඳහා වෙනස් කරන්නේ කොහොමද කියන එක ගැන හිතන එක. ඒ සඳහා ක්‍රියාකාරීව මැදිහත්වෙන එක.
#. ජීවිතේ වෙනත් තෝරා ගැනීම් ගොඩක් තියෙද්දී ඇයි දේශපාලනය තමන්ගේ මාර්ගය විදියට තෝරගත්තේ?
මම ඉස්සෙල්ලාම දේශපාලන වැඩවලට සම්බන්ධ වෙන්නෙ ඒ වැඩවලට දක්වපු ආසාව නිසා. ඒ ආසාව ඇතිවෙන්නෙ මගෙ තාත්තා නිසා. පස්සෙ වැඩ ඇතුළෙ තමයි දේශපාලන සිතීම වර්ධනය වුණේ. කෙල්ලෙක් හැටියට මම අත්විඳින පීඩාවක් තියෙනවා. ඒ වගේම මගේ අවට සිටින බහුතරයක් දෙනා විඳින පීඩාව මම දැකලා තියෙනවා. ඒකට හේතුව අපි කරපු පව් හරි කරුමයක් හරි නොවන බව මම දන්නවා. ඒ නිසා ඒක වෙනස් විය යුතුයි කියන අදහස ඇතුව වැඩ කරනවා.
#. ඔබ කලක් පූර්ණකාලීනව මාධ්‍යකරණයෙත් නියැලුණා. ජන මාධ්‍යද, ජඩ මාධ්‍යද කියල මේ දිනවල සංවාදයකුත් යනවා. මාධ්‍යයේ සමස්තය ගැන ඔබේ අදහස කුමක්ද?
ඔය සංවාදය හරිම වැදගත් එකක්. ජන මාධ්‍ය ජනතාව ගේ මත හසුරුවන ආකාරය විතරක් නෙමෙයි, ඔය ආයතන ඇතුළේ ජනමාධ්‍ය වෘත්තිකයන් මුහුණ දෙන ප්‍රශ්න ගැනත් කතාකරන්න ඕන. ගොඩක් මාධ්‍ය ආයතනවලට ස්ථිර සේවකයෝ බඳවා ගන්නේ නැහැ. ගොඩක් අය ඉන්නේ නිදහස් මාධ්‍යවේදීන් ලෙස. එතකොට එම මාධ්‍ය ආයතනයට ඒ මාධ්‍යවේදියා සම්බන්ධයෙන් කිසිම වගකීමක් නැහැ. හරියට ගෙවීමක් කරන්නේ නැහැ. වෘත්තීය අයිතිවාසිකම් කිසිම දෙයක් ලැබෙන්නේ නැහැ. ඒ වගේ ම ඇතුළේ ස්ථිර ලෙස වැඩ කරන සේවකයන්ගේ තත්ත්වයේත් වෙනසක් නැහැ. හිතුන හිතුන වෙලාවට එළියට දානවා. නැත්තම් ආයතන වහලා දානවා. රැකියා සුරක්ෂිතතාවය බින්දුවයි. සමහර මාධ්‍ය ආයතනවල වෘත්තීය සමිතියකට සම්බන්ධවීමත් තහනම් කර තිබෙනවා. මම හිතන්නේ මේ ජඩ මාධ්‍යකරණයට වගේම මෙම වෘත්තීය අයිතිවාසිකම් වෙනුවෙනුත් ජනමාධ්‍ය වෘත්තිකයන් ඇතුලු සියලු දෙනා එකට එකතුව අරගල කළ යුතුයි. නමුත් තවත් දෙයක්, මේ වගේ අරගලවල සිදුකළ යුත්තේ ජනතාවගේ පැත්තේ සිටිමින් ජනතාවගේ දේශපාලන සාක්ෂරතාවය සහ විකල්ප ජනමාධ්‍ය ක්‍රියාකාරිත්වය ප්‍රසාරණය කරමිනුයි. නැත්තම් ඒවා ටික කාලෙකින් කාගෙ හරි ඡන්ද ව්‍යපාරයක් බවට පත්කර ගන්නවා.
#. ඔබත් නියෝජනය කරන ලංකාවෙ ‘වම’ ගැන ඔබේ අදහස මොකද්ද? යන විදිය හරිද, විවේචනයක් තියෙනවද?
ඔව්! පැහැදිලිවම විවේචනයක් තියෙනවා. වම මාර ෂෝක්, ගොඩක් හොඳට යනවා කියලා කියන්න බැහැ. වම ගැන තිබෙන විශ්වාසය ගොඩක් අයගෙන් ගිලිහෙමින් යනවා. ලංකාවේ වම වර්ධනය කරගත යුතු තව බොහෝ දේ තියෙනවා. හැබැයි විවේචන කර කර නිකන් ඉන්න ලෑස්ති නැති, වම ගැන බලාපොරොත්තු අත්නොහැරපු විශාල පිරිසකුත් තවමත් ඉන්නවා. ඔවුන් විවේචන සහිතව එය වෙනස් කිරීමට පොරබදනවා, වැඩ කරනවා. මමත් එහෙමයි.
#. වෙනස් සහ අලුත් ලෝකයක් බිහි කරගැනීම වෙනුවෙන් සාහිත්‍යය සහ කලාව යොදාගත යුත්තේ කෙසේද කියල ඔබට තක්සේරුවක් තියෙනවද?
අලුත් ලෝකයක් බිහිකර ගැනීම වෙනුවෙන් සාහිත්‍යට, කලාවට කළ හැකි දේ වෙනත් කිසිම දෙකට සමකරන්න බැරි වෙයි. නමුත් එය කළ හැකිවන්නේ වෙළඳ පොළ අධිපත්‍යයෙන් යම් තරමකට හෝ මිදුණු විකල්ප සාහිත්‍ය සහ කලාවකට විතරයි. ඒ කියන්නේ එම කලාව සහ සාහිත්‍ය සමාජයේ පහත මාලය නියෝජනය කරන්නක් වෙන්න ඕන.
#. මේ හැම දෙයක් ම ඇතුළෙ ස්ත්‍රිය ගේ කාර්යභාරය විය යුත්තේ කුමක්ද?
ස්ත්‍රිය ගේ කාර්යභාරයත් පිරිමිත් සමඟ සමානව උරෙන් උර ගැටෙමින් සමාජය යහපත් තැනක් කරන්න අරගල කරන එක. ස්ත්‍රීන්ට තල දෙකක අරගලයක් කරන්න වෙනවා. එකක් තමන් විඳින විශේෂ පීඩාව අවසන් කිරීම සඳහා අරගලය. අනික පොදු ආර්ථික පිඩාවට එරෙහි අරගලය. රුසියානු විප්ලවාදිනියක් කියලා තියෙනවා ස්ත්‍රී විමුක්තියෙන් තොර කොමියුනිස්ට්වාදයක්වත්, කොම්යුනිස්ට්වාදයෙන් තොර ස්ත්‍රී විමුක්තියක්වත් ගැන හිතන්න බැහැ කියලා. ඒ නිසා මේක ඇතුළේ ස්ත්‍රියගේ කාර්යභාරය හරි ම වැදගත්. ස්ත්‍රිය ගේ මැදිහත්වීමකින් තොරව සමාජ ප්‍රගමනයක් ගැන හිතන්න බැහැ. .
#. එක්සත් වමක් පිළිබඳ සිහිනයක් ඔබට තියෙනවද?
ඒක හරි අමාරු ප්‍රශ්නයක්. ඒ වගේ ම අමාරු වැඩක්. වම එක්සත් කරන්න කලින් වාමාංශික අවකාශය පුළුල් කිරීම සඳහා ක්‍රියාකාරීව මැදිහත්ව්මේ සිහිනයක් මට තියෙනවා.
කසුන් සමරතුංග ඇත්ත පුවත්පතට කරන ලද සංවාදයකි.
Facebook Comments
