ආරක්ෂාවත් නීතිය හා සාමය රැකීම සඳහා තමන්ට රාජකාරි කිරීමට ජනාධිපතිවරයාගෙන් පැමිණි බාධා කිරිම් පිළිබඳව පාස්කු බෝම්බ ප්‍රහාරයෙන් පසු වැඩ තහනම් කරන ලද පොලිස්පති හා ඉල්ලා අස්වු ආරක්ෂක ලේකම් විසින් විස්තර කර තිබේ.
රාජපක්ෂ පාලන සමයේදී රජයේ ආරක්ෂක අංශ විසින් දියත් කරණු ලැබු අපරාධ සම්බන්ධව පරීක්ෂණ මෙහෙයවන ප්‍රධාන විමර්ශන නිලධාරියා හට ස්ථාන මාරුවීමක් ලබා දෙන ලෙස ජනාධිපතිවරයා ආරක්ෂක ලේකම්වරයා හරහා තමන්ට බලපෑම් කළ බව අනිවාර්ය නිවාඩු යවා ඇති පොලිස්පතිවරයා පාස්කු ඉරිදා එල්ල වූ මරාගෙන මැරෙන ප්‍රහාරය සම්බන්ධයෙන් විමර්ශනය කෙරෙන පාර්ලිමේන්තු තේරීම් කාරක සභාව ඉදිරියේ 06 බ්‍රහස්පතින්දා හෙළි කළේය.
ආරක්ෂක මාණ්ඩලික ප්‍රධානියා ද සැකකරුවෙකු ලෙස නම් කර ඇති කොළඹ සහ තදාසන්න ප්‍රදේශ වලින් පුද්ගලයින් පැහැර ගැනීම සම්බන්ධ විමර්ශණ කටයුතු සිදු කරන ලබන අපරාධ විමර්ශණ දෙපාර්තමේන්තුවේ සමූහ මංකොල්ල විමර්ශණ අංශයේ ස්ථානාධිපති නිශාන්ත සිල්වා මාරු කර යැවීමට ජනපතිගේ බලපෑම් එල්ලවු බවයි පොලිස්පති පුජිත් ජයසුන්දර පවසන්නේ.
අදාළ නිලධාරියා මාරු කර යැවීමට තමන් නොකමැත්ත පළ කළ නිසා ජනාධිපතිවරයා තමන් සමඟ අමනාප වන්නට ඇති බව පුජිත් ජයසුන්දර තේරිම් කමිටුව හමුවේ විශ්වාසය පළ කර සිටියේය.
ව්‍යවස්ථා විරෝධි ලෙස මහින්ද රාජපක්ෂ අගමැති ධුරයට පත් කිරිමෙන් පසුව ජනාධිපතිවරයාගේ නියෝග මත පොලිස්පතිවරයා විසින් අපරාධ විමර්ශණ දෙපාර්තමේන්තුවේ සමූහ මංකොල්ල විමර්ශණ අංශයේ ස්ථානාධිපති නිශාන්ත සිල්වා මීගමුව කොට්ඨාශයේ සාමාන්‍ය රාජකාරි සඳහා මාරු කර යැවීමට කටයුතු කර තිබුනි.
2018 වසරේ ඔක්තෝබර් මස 23 වන දා පැවති ආරක්ෂක කවුන්සිලය රැස්වීමෙන් අනතුරුව පැවති රැස්වීම් සඳහා තමන් සහභාගි විය යුතු නැතැයි ජනාධිපතිවරයා දැන්වූයේ යැයි ආරක්ෂක අමාත්‍යංශයේ එවක ලේකම් කපිල වෛද්‍යරත්න තමන්ට දැනුම් දුන් බව වැඩ තහනමට ලක්ව සිටින පොලිස්පති පූජිත් ජයසුන්දර පැවසීය.
ඉන්පසු තමන් යළි ආරක්ෂක කවුන්සිලයට කැඳවනු ලැබුවේ, පාස්කු ඉරු දින ප්‍රහාරයෙන් පසුව 2019 අප්‍රේල් 23 වන දා බව ඔහු සඳහන් කළේය.
පාස්කු ප්‍රහාරයෙන් පසුව ප්‍රහාරයේ වගකීම බාර ගෙන පොලිස්පති තනතුරෙන් ඉල්ලා අස්වීමට ජනාධිපතිවරයා බලපෑම් කළ බව හා එසේ වගකීම බාර ගත්තා නම් තානාපති ධූරයක් ලබා ගැනීමට අවස්ථාව තිබුණු බව ද හෙතෙම පෙන්වා දුන්නේය.
“මේ වෙනකොට පරීක්ෂණ කණ්ඩායමක් පත් කරලා තියෙනවා. මොන පරීක්ෂණය කළත් අනිවාර්යයෙන් ම වැරදිකරු විදිහට ඔබව පත් වෙනවාමයි. ඒක නිසා එහෙම වෙලා ඉවරවෙලා හිටං පෙන්ෂන් එකත් නැතුව ගෙදර යනව ද? එහෙම නැත්නම් වරද පිළි අරගෙන අස්වීම දෙනව ද? ඒක තමයි කිව්වේ,” යැයි පුජිත් ජයසුන්දර පැවසීය.
පාස්කු ප්‍රහාරය පිළිබඳව 2019 අප්‍රේල් 09 වන දා මුල් වරට දැන ගන්නට ලැබුණ බව පැවසු අනිවාර්ය නිවාඩු ලබා සිටින පොලිස්පති, ප්‍රහාරයට පෙර දින රාත්‍රියේ ආරක්ෂක ලේකම්වරයා හාජාතික බුද්ධි තොරතුරු මධ්‍යස්ථානයේ ප්‍රධානියා තමන්ට දුරකතන ඇමැතුම් ලබා දී ප්‍රහාරයක් ගැන අනතුරු ඇඟවු බවයි.
කෙසේ වෙතත් පාස්කු ප්‍රහාර මාලාවේ නායකයා ලෙස ආරක්ෂ අංශ විසින් පවසන සහරාන් හෂීම් පිළිබඳව පොලිස් ත්‍රස්ත විමර්ශන කොට්ටාශයේ හිටපු ප්‍රධානී නියෝජ්‍ය පොලිස්පති නාලක සිල්වා ජනාධිපති මෛත්‍රීපාල සිරිසේන වෙත කැඳවා ගෙන ගොස් දැනුවත් කළ බව ද ඔහු කියා සිටියේය.
Facebook Comments
