මාධ්‍ය වාර්තා පිළිබඳව ප්‍රශ්න කිරීමට අයිතිය ඇතත් ඒ ඔස්සේ මාධ්‍ය මර්දනයක් දියත් කරන්නේ නම් එයට විරුද්ධව නැඟි සිටින බව වෙබ් මාධ්‍යවේදිනයක අවධාරණය කර තිබේ.
“අපි වැඩ කරන්නේ මාධ්‍ය ආචාර ධර්ම වලට අනුකූලව. සමහර ප්‍රශ්න කිරීම් කරන්න අවශ්‍ය නම් ඒවා කිරිමේ ගැටලුවක් නැහැ. හැබැයි ඒ ඔස්සේ මාධ්‍ය මර්දනයක් කරනවා නම් අපි ඒකට විරුද්ධ වෙනවා,” යි තුෂාරා සෙව්වන්දි විතාරණ මාධ්‍ය වෙත කියා සිටියාය.
වොයිස් ටියුබ් යු ටියුබ් නාලිකාවේ සංස්කාරිකාව හා ද ලීඩර් වෙබ් අඩවියේ මාධ්‍යවේදිනියක වන තුෂාරා සෙව්වන්දි 28 බ්‍රහස්පතින්දා පැය 6 කට අධික කාලයක් අපරාධ පරීක්ෂණ දෙපාර්තමේන්තුවේ ප්‍රශ්න කිරිම් වලට ලක් විය.
ද ලීඩර් වෙබ් අඩවියේ පළ වු විඩියෝවක් සම්බන්ධව ප්‍රශ්න කිරීමට ලක්වු බව පවසන ඇය එම වකවානුවේදී මාධ්‍ය වැඩසටහනක් සඳහා චීනයට ගොස් සිටි බව රහස් පොලිසියට ප්‍රකාශයක් ලබා දීමෙන් අනතුරුව මාධ්‍ය වෙත පැවසුවාය.
අදාළ පරීක්ෂණ දිගින් දිගටම පැවැත්වෙන බව හා ඉදිරියේදී ඒ සම්බන්ධ තවත් මාධ්‍යවේදින්ගෙන් අපරාධ පරීක්ෂණ දෙපාර්තුමේන්තුව ප්‍රශ්න කරනු ඇතැයි තුෂාර සෙව්වන්දි වැඩි දුරටත් විශ්වාසය පළ කළාය.
Facebook Comments
