මෙතෙක් කලක් එක්සත් ජාතීන්ගේ සංවිධානයේ ඇගයීමට ලක් වූ යහපාලන රජය වෙත හෙට (08) දිනයේදී වධහිංසාවලට එරෙහි එක්සත් ජාතීන්ගේ කමිටුව විසින් දෝස් මුරයක් නැඟීමට සුදානමක් පවතින බව සිලෝන් ජර්නල්ස් වෙත වාර්තාවේ.
ජිනීවා නුවර රැස්වෙන වධ හිංසා කමිටුවේ නිර්දේශ ඇතුලත් වාර්තාව හෙට දිනයේදී එළි දැක්වෙන අතර කමිටු සමාලෝචන සැසියට සහභාගී වු ශ්රී ලංකාවේ බුද්ධි අංශ ප්රධානියා එම කමිටුව විසින් අසන ලද ප්රශ්න වලට පිළිතුරු දීමට අපොහොසත්වු අතර ලංකාවේ කිසිදු නියෝජිතයෙක් ඔහු වෙනුවෙන් පෙනී නොසිටියේය.
බුද්ධි අංශ ප්රධානි සිසිර මෙන්ඩිස් වෙත නඟන ලද ප්රශ්න වලට ලිඛිතව පිළිතුරු ලබා දීමට එම කමිටුව විසින් ශ්රී ලංකාවේ රජයට පැය 48 කාලයක් ලබා දුන් අතර වධ හිංසාව වැළැක්වීමට ගෙන ඇති පියවර සම්බන්ධව ලංකාව රජය ලබා දුන් එම වාර්තාව ගැන වධ හිංසාව වැළැක්වීමේ කමිටුව සෑහීමකට පත්ව නැති බවටයි වාර්තා වන්නේ.
කට උත්තර නෑ
වධහිංසාවලට එරෙහි එක්සත් ජාතීන් ගේ කමිටුවේ උප සභාපතිනි ෆෙලීස් ගෙයර් විසින් යුද්ධය අවසානයේ පොලිස් විමර්ශන ඒකක දෙකක් විසින් උතුරේදී දෙන ලද වධහිංසා සම්බන්ධයෙන් බුද්ධි ප්රධානියාගෙන් බරපතළ ලෙස ප්රශ්න කළ අතර ඔහු ඒ කිසිවකටත් පිළිතුරු දීමට අපොහොසත් විය.
කමිටුව අවධාරණය කර සිටියේ එම වධ හිංසාවන් සිදු වු සමයේ ඒවාට සම්බන්ධ යැයි චෝදනා නැගෙන රහස් පොලිසිය හා ත්රස්ත විමර්ශන ඒකකය භාරව කටයුතු කර ඇත්තේ නියෝජ්ය පොලිස්පති සිසිර මෙන්ඩිස් බවත් කමිටුව විසින් ඔහුගෙන් පිළිතුරු බලාපොරොත්තු වන බවත්ය.
යුද්ධයෙන් පසු උතුරේ දෙමළ වැසියන්ට මෙන්ම මාධ්යවේදීන්ට සිදු වු වධ හිංසා සම්බන්ධව හා නොකැමැත්තෙන් සිදු වු අතුරුදහන් කරවීම් සම්බන්ධව සිවිල් සංවිධාන හා ස්වාධීන මාධ්ය සංවිධාන විසින් සිසිර මෙන්ඩිස් වෙත චෝදනා එල්ල කර තිබුනි.
කෙසේ වෙතත් සිසිර මෙන්ඩිස් වැන්නන් මෙම සමාලෝචනයට සහභාගි කරවීම අනුවන ක්රියාවක් බවටත් කමිටුව විසින් අසන ලද ප්රශ්න සඳහා රජය නියෝජනය කරමින් සහභාගී වු නියෝජිතයින් නිසි ආකාරව පිළිතුරු ලබා දීමට අපොහොසත්වු බවත් නොවැම්බර් 15 සහ 16 පැවති සැසිය නිරීක්ෂණය කළ මානව හිමිකම් ක්රියාධරයෝ පෙන්වා දෙති.