අගමැතිවරයාට එරෙහිව ගෙන එන ලද විශ්වාසය භංගයෙන් පසු පැවැත්වෙන පලමු කැබිනට් හමුව වර්ජනය කිරිමට ශ්‍රී ලංකා නිදහස් පක්ෂ මධ්‍යම කාරක සභාව තීරණය කර තිබේ.
විශ්වාස භංගයට සහාය දුන් මෙන්ම ඡන්දය දීමෙන් වැළකී සිටි ශ්‍රීලනිප අමාත්‍යවරුන්ද අප්‍රේල් 10 කැබිනට් මණ්ඩලය වර්ජනය කරන බව මධ්‍යම කාරක සභාව 09 සඳුදා රැස්වු අවස්ථාවේදී තීරණය කල බවයි එක්සත් ජනතා නිදහස් සන්ධානයේ මහ ලේකම් මහින්ද අමරවීර පවසන්නේ.
ජාතික ආණ්ඩුවේ සිටිනවා ද නැද්ද යන්න සම්බන්ධයෙන් මෙහිදි සාකච්ඡා වී ඇති අතර ශ්‍රී ලංකා නිදහස් පක්ෂය ජාතික ආණ්ඩුවෙන් ඉවත් විය යුතු බව අමාත්‍යවරුන් කිහිපදෙනෙකුම යෝජනා කර තිබේ.
අග්‍රාමාත්‍ය රනිල් වික්‍රමසිංහ එරෙහිව ඉදිරිපත් වූ විශ්වාසභංග යෝජනාවට සහය පල කළ ශ්‍රී ලංකා නිදහස් පක්ෂයේ මන්ත්‍රීවරුන් 16 දෙනා පමණක් නොව පක්ෂයක් ලෙස සියලු මන්ත්‍රීවරුන් ආණ්ඩුවෙන් ඉවත් විය යුතු බවට ඇමැතිවරුන් කිහිප දෙනෙකුම මෙම හමුවේදී අවධාරණය කර ඇත.
හිටපු ජනාධිපති චන්ද්‍රිකා බණ්ඩාරනායක කුමාරතුංග, ශ්‍රීලනිප මහ ලේකම් දුමින්ද දිසානායක සහ මහින්ද අමරවීර අමාත්‍යවරයා දීර්ඝ වශයෙන් කරුනු දක්වා ඇත්තේ එක්සත් ජාතික පක්ෂය සමග එක්ව හවුල් ආණ්ඩුව දිගටම පවත්වාගෙන යාම වෙනුවෙනි.
පක්ෂයක් ලෙස හදිසි නොවී ශ්‍රී ලංකා නිදහස් පක්ෂයේ මන්ත්‍රීවරුන් 41 දෙනාම ඒකමතික තීරණයකට එළඹිය යුතු බව ජනාධිපතිවරයා මධ්‍යම කාරක සභාව වෙත පෙන්වා දුන් බවයි දේශපාලන ආරංචි මාර්ග පවසන්නේ.
ඒ අනුව ඒ පිළිබඳ අවසන් තීරණයක් ගැනීම සඳහා ශ්‍රී ලංකා නිදහස් පක්ෂයේ මධ්‍යම කාරක සභාව යළි හෙට(11) දිනයේ රැස්විමට තීරණය ක ල බවයි මධ්‍යම කාරක සභාව නියෝජනය කරන ඇමැතිවරුන් මාධ්‍යයට කියා තිබුණි.
කෙසේ වෙතත් අදාළ තීන්දුව ගන්නා තුරු අද දිනයේ පැවැත්වෙන කැබිනට් රැස්විමට ශ්‍රී ලංකා නිදහස් පක්ෂය නියෝජනය කරන කිසිදු අමාත්‍යවරයෙකු සහභාගි නොවීමට තීරණය කර ඇත.
Facebook Comments
