උතුරේ ජනතාව මහවිරු සමරු පවත්වා යුද්ධයෙන් මියගිය විමුක්ති කොටි සාමාජිකයන් අනුස්මරණය කිරීම මගින් රට බෙදී යාමේ අවදානමක් නොමැති බව හමුදාපතිවරයා අවධාරණය කරයි.
එම අනුස්මරණ රටේ ආරක්ෂාවට තර්ජනයක් වෙතැයි දකුණේ කරනු ලබන බිය ගැන්වීම් බැහැර කරන ලුතිනන් ජෙනරාල් මහේෂ් සේනානායක ඒ සම්බන්ධයෙන් යුද හමුදාව සැලකිලිමත්ව ඉන්නා බව ශ්‍රී ලංකා යුද හමුදාවට 69 අවුරුද්දක් පිරීම නිමිත්තෙන් අනුරාධපුර ජයශ්‍රී මහා බෝධිය අබියස පැවති හමුදා ධජ සඳහා සෙත් පැතීමේ උත්සවයක් අවසානයේ කියා සිටියේය.
“එල්ටීටීඊ සංවිධානය වෙනුවෙන් සිදු කරනවා කියලා පැවැත්වෙනවානම්, යම්කිසි මතයක් රට තුල ඇතිවෙන්නට පුළුවන්. ඒ වගේම සැලකිලිමත් විය යුතුයි. ඒක හැබැයි ආරක්ෂාවට තර්ජනයක් නෙවෙයි. එක දිනයකට පැය කීපයකට එවැනි සංවිධානයක් කරපු උත්සවයක් පැවැත්වීමෙන් මේ රටේ ආරක්ෂාවට තර්ජනයක් වෙලා මේ රට නැවත බෙදෙන්නේ නම් නැහැ.”
“සිංහල, බෞද්ධ, දෙමළ, හින්දු, මුස්ලිම්, ක්‍රිස්තියානි ඕනේ කෙනෙක්ට පොදු දෙයක් තමයි මිනිස්සු මියයාම. ඉතින් මියනවුන් සිහිපත් කිරීම ගැන අපේ ගැටළුවක් නෑ” යි මහවිරු සමරු පැවැත්වීම සම්බන්ධයෙන් මාධ්‍යවේදියකු කළ විමසීමකට පිළිතුරු දෙමින් හමුදාපති ලුතිනන් ජෙනරාල් මහේෂ් සේනානායක පැවසීය.
Facebook Comments
