එක්සත් ජාතික පක්ෂය පිළිබඳව තමන් හට වැටහීමක් ඇති වුයේ ව්‍යවස්ථා විරෝධි ක්‍රමන්ත්‍රණය පැවති සමයේ බව එක්සත් ජනතා නිදහස් සන්ධාන මන්ත්‍රීවරයෙකු ආණ්ඩුවේ සංවර්ධන ව්‍යපෘතියක් ආරම්භ කිරීමට එක්වෙමින් ප්‍රකාශ කර ඇත.
අගමැතිවරයා ද අලියෙකු මෙන් ශක්තිමත් බව මෙන්ම එක්සත් ජාතික පක්ෂයට ගරු කළ යුතු බව එක්සත් ජනතා නිදහස් සන්ධාන මන්ත්‍රී විජිත් විජිතමුණි සොයිසා 24 ඉරිදා හම්බන්තොට තෙල් පිරිපහදුවේ ඉදිකිරීම් ආරම්භ කිරීමේ උත්සවයට එක්වෙමින් කියා සිටියේය.
“අපි හිතුවේ අලියා ලොකු දැවැන්ත සතෙක් වුණාට ඇහැ පුංචි නිසා අලියට උගෙ තරම තේරෙන්නෙ නැහැ කියලා. දෙයි හමුදුරුවනේ මේකෙ තරම දැන ගත්තේ දින 52න්.” යැයි මන්ත්‍රීවරයා පැවසීය.
රනිල්ගේ ඔළුව
ආර්ථික කළමණාකරනයට රාජපක්ෂ සමාගම අසමත් බව ලෝකයටම පෙන්වා අවසන් බව පෙන්වා දුන් විජිත් විජිතමුණි සොයිසා මන්ත්‍රීවරයා නැවත ඔවුනට නොරැවටෙන බව ද සඳහන් කළේය.
රටේ ආර්ථිකයේ හැරවුම් ලක්ෂ්‍යය අග්‍රාමාත්‍ය රනිල් වික්‍රමසිංහ බවත් “රනිල් වික්‍රමසිංහ මැතිතුමාගේ ඔළුවෙන් වැඩ ගන්න ඕනේ.” යැයි ද මන්ත්‍රීවරයා කියා සිටියේය.
යහපාලන රජය බලාපොරොත්තු වු ප්‍රජාතන්ත්‍රවාදය හා සංහිඳියාව බොඳ වු සිහිනයක් බවට පත්වෙමින් තිබුණ ද එය නැවත ගොඩනැංවිය හැකි වනු ඇති බවට එක්සත් ජනතා නිදහස් සන්ධාන මන්ත්‍රී විජිත් විජිතමුණි සොයිසා විශ්වාසය පළ කළේය.
Facebook Comments
