තමන් ලැබී ඇත්තේ බිම් බෝම්බයක් වැනි අමාත්‍යංශයක් බව විදුලිබල.බලශක්ති සහ ව්‍යාපාර සංර්ධන අමාත්‍යවරයා ප්‍රකාශ කර තිබේ.
කෙසේ නමුත් මාස කිහිපයක් ඇතුලත ශක්තිමත් අඩිතාලමක් යොදා දැනට පවතින ප්‍රශ්න තවත් අමාත්‍යවරයෙකුට යාම වළක්වාලන බවට රවී කරුණානායක ඇමැතිවරයා සහතික වී ඇත.
“මට දීලා තියෙන්නේ බිම් බෝම්බයක් වගේ අමාත්‍යාංශයක්. නමුත් මාස 02 ක් 03 ක් යද්දි ඉතාමත් ශක්තිමත් අඩිතාලමක් මත කටයුතු කරලා, තවත් කිසිම අමාත්‍යවරයෙක්ට මේවගේ ප්‍රශ්න කවදාවත් ඇති නොවන විදියට කටයුතු කරනවා.” යි අමාත්‍යවරයා පසුගියදා උතුරු කොළඹ ආසනයේ රැකියා විරහිත කාන්තාවන් වෙනුවෙන් ස්වයං රැකියා සදහා මහන මැෂින් ලබාදීමේ උත්සව අවස්ථාවකට එක්වෙමින් කියා සිටියේය.
අරපරිස්සමෙන් විදුලිය පරිහරණය කරන්නේ නම් කප්පාදුවක් කිරීමට අවශ්‍ය නැති බව කී ඇමැතිවරයා විදුලි හිඟයක් පවතින බව ද සඳහන් කළේය.
හදිස්සි විදුලි මිලදී ගැනීමකට නොයාමට බලාපොරොත්තුවන බවත් වඩා යෝග්‍ය දීර්ඝ ජනන සැලැස්මකට යාමට අපේක්ෂා කරන බවයි රවී කරුණානායක ඇමැතිවරයා පෙන්වා දෙන්නේ.
“2015 දී මට ලැබුණේ දණ ගහලා, වට්ටලා තිබුණ අමාරු අමාත්‍යාශයක්. මේ පාරත් මට ලැබුණේ යටිතල පහසුකම් අතින් අමාරුම අමාත්‍යාංශයක්. නමුත් අහිංක කජනතාවට වැඩියෙන් උදව් කරන්න පුළුවන් අමාත්‍යාංශයක්. සතියක්, දෙකක්, තුනක් මට බනීවි. ඉල්ලුමට සරිලන සැපයුමක් ලබාදීලා නැහැ මේතාක් කාලයකට. දැන් තමයි අපි ඒ තත්ත්වය ගොඩනගාගෙන යන්නේ. නමුත් අපි හදිසි විදුලිය මිලදී ගැනීමකට යන්න බලාපොරොත්තු වෙන්නේ නැහැ. ඊට වඩා යෝග්‍ය දීර්ඝ ජනන සැලැස්මකටයි අපි යන්නේ.”
අමාත්‍යංශය බාර ගෙන කෙටි කලික් තුල සියලු ගැටළු වලට විසඳුමක් ලබා දිය නොහැකි බව පෙන්වා දුන් විදුලිබල.බලශක්ති සහ ව්‍යාපාර සංර්ධන අමාත්‍ය රවී කරුණානායක විදුලිය කප්පාදු කිරීමට සිදු වීම සම්බන්ධයෙන් ජනතාවගෙන් සමාව අයැද සිටියේය.
Facebook Comments
