එක්සත් ජාතික පක්ෂයේ ඉදිරි ජනාධිපතිවරණ අපේක්ෂයා ලෙස අගමැති රනිල් වික්‍රමසිංහ ඉදිරිපත් වන බවට ඉඟි පළ කර තිබේ.
අග්‍රාමාත්‍යවරයාගේ 70 වන උපන් දිනය වෙනුවෙන් එජාපයේ සියලු මන්ත්‍රීවරුන් සහ කෘත්‍යාධිකාරී මණ්ඩලයට ආරාධනා කර අරලිය ගහ මන්දිරයේ පැවති සාදයේදී මේ බව අනාවරණය වී ඇත.
එම සාදයේ දී අගමැති රනිල් වික්‍රමසිංහ පිළිබඳව වාර්තා වැඩසටහන විකාශය කර තිබූ අතර එමගින් අවධාරණය කර තිබුණේ රට ඉදිරියට ගෙන යාමට නම් සුදුසුකම නායකයා හා එජාපයේ සිටින එකම සුදුස්සා රනිල් වික්‍රමසිංහ බවයි.
අදාළ වාර්තා වැඩසටහන අගමැතිවරයාගේ ප්‍රචාරක ලේකම්වරිය වන ඉෂිනි වික්‍රමසිංහ හා අමාත්‍ය සාගල රත්නායකගේ උපදෙස් මත සකසා ඇති බවටයි වාර්තා වන්නේ.
මේ අතර එක්සත් ජාතික පක්ෂ නායක ලෙස රනිල් වික්‍රමසිංහ ජනාධිපතිවරණයට ඉදිරිපත් විය යුතු බවට අමාත්‍ය ෆිල්ඩ් මාර්ෂල් සරත් ෆොන්සේකා පසුගිය දිනක මාධ්‍ය වෙත කියා තිබුණි.
එජාප නායකයා ජනාධිපතිවරණයට ඉදිරිපත් වුවහොත් ඔහු දිනවීමට කටයුතු කරන බව ද අමාත්‍යවරයා වැඩි දුරටත් කියා සිටියේය.
Facebook Comments
