විදේශ අමාත්‍ය මංගල සමරවීරට එරෙහිව රාජද්‍රෝහී වීමේ චෝදනා යටත් නඩු පැවරිය යුතු බව මහින්ද රාජපක්ෂ පාලනය යටතේ නියෝජ්‍ය අමාත්‍ය ධුරයක් හෙබවූ හිටපු නාවික සෙන්පතියෙක් පවසයි.
“සමස්ත ජාතියම පාවාදීම සම්බන්ධයෙන් ද, මේ රට රැකගත් රණවිරු සෙබළුන් පාවාදීම සම්බන්ධයෙන්ද,” මංගල සමරවීර අමාත්‍යවරයාට නඩු පැවරිය යුතු බව රියර් අද්මිරාල් සරත් වීරසේකර විසින් ප්‍රකාශ කරන ලද්දේ යුද්ධය සහ මානව හිමිකම් උල්ලංඝන සම්බන්ධයෙන් කොළඹදී දේශනයක් පවත්වමිනි.
එක්සත් ජාතීන්ගේ මානව හිමිකම් මණ්ඩලයේදී එක්සත් ජනපදය හා එක්ව ශ්‍රී ලංකාව සම්බන්ධයෙන් යෝජනාවක් සම්මත කර ගැනීම අමාත්‍යවරයාට නඩු පැවරිය යුතු ජාතිද්‍රෝහී අපරාධයක් ලෙසින් හිටපු නාවික සෙන්පතියා විසින් හඳුන්වන්වන ලද්දේ ‘ජිනීවා යෝජනාව සහ පෙඩරල්වාදය අද’ මැයෙන් ගෝලීය ශ්‍රී ලංකා සංසදය නම් සංවිධානයක් විසින් ඉංග්‍රීසියෙන් පවත්වන ලද සම්මන්ත්‍රණයක් අමතමිනි.
යුද අපරාධ නඩු ඇසීම
එක්සත් ජාතීන් සම්බන්ධයෙන් ශ්‍රී ලංකාවේ ආණ්ඩුව අනුගමනය කරන ක්‍රියා කලාපය සිවිල් ආරක්ෂක බලකායේ ප්‍රථම අධ්‍යක්‍ෂ ජනරාල් ද වන රියර් අද්මිරාල් වීරසේකර විසින් දෝෂ දර්ශනයට ලක් කරන ලද්දේ බියගුළු සහ ලජ්ජා සහගත එකක් ලෙසිනි.
ස්වෛරී රාජ්‍යයක් ලෙසින් ශ්‍රී ලංකාවේ ජනතාව විසින් ලබා දී තිබෙන යුක්තිය පසිඳලීමේ ‘අනුල්ලංඝනීය’ වරම ‘බියගුළු සහ ලජ්ජා සහගත අයුරින් සෙයිද් හුසේන් නම් තනි පුද්ගලයකුට’ පවරා ඇති බවටත් චෝදනා කළේය.
සෙයිද් රාද් අල් හුසේන් විසින් මහ ලේකම් ධුරය හොබවනු ලබන එක්සත් ජාතීන්ගේ මානව හිමිකම් මණ්ඩලය පසුගිය වසර අගදී ශ්‍රී ලංකාව සම්බන්ධයෙන් සම්මත කරගන්නා ලද යෝජනාවෙන් යුද්ධයේ සිදුවූ අපරාධ සම්බන්ධයෙන් විභාග කිරීමේ වගකීම පවරන ලද්දේ ශ්‍රී ලංකාවටමය.
ෆෙඩරල් විරෝධය
ශ්‍රී ලංකාව පෙඩරල් පන්නයේ පාලනයක් බවට පත් කිරීමට දැරෙන උත්සාහයක් ඇති බවට චෝදනා කළ රියර් අද්මිරාල් සරත් වීරසේකර, එය හැඳින්වුයේ ‘ඒකීය රටක් ගොඩනැගීමට සටන් කළ සොල්දාදුවන්ගේ ජීවිත අපතේ යැවීමක්’ ලෙසයි.
“අපේ රට ෆෙඩරල් රාජ්‍යයක් කිරීමට හෝ අපේ රණවිරුවන් ජාත්‍යන්තර අධිකරණයකට ගෙනයාමට හෝ අපි කිසිවිටෙකත් ඉඩ නොදෙමු,” යි සභාව හමුවේ ඔහු සපථ කළේය.
කෙසේ වෙතත්, රට පුරා මහජන මත විමසා ආණ්ඩු ක්‍රම ව්‍යවස්ථා ප්‍රතිසංස්කරණ කමිටුව විසින් රජයට භාරදී ඇති වාර්තාවෙන් ඉදිරිපත් කොට ඇති නිර්දේශ මගින් ශ්‍රී ලංකාව ඒකීය රාජ්‍යයක් ලෙස පවත්වාගෙන යාම තහවුරු කොට තිබේ.
(Radiogagana)
Facebook Comments
