ඕස්ට්‍රෙිලියාවේ ස්ථිර පදිංචිය ඉල්ලා සරණාගත කතුන් දීර්ඝ පා ගමනක

ජීවිත ආරක්ෂාව ගැන බියෙන් සිය රටට ආපසු යාමට නොහැකිව කැන්ගරුවන්ගේ දේශයේ වාසය කරන සරණාගතයන්ට සහය දක්වමින්, ඕස්ට්‍රෙිලියාවේ සරණාගත කාන්තාවන් දුසිම් ගණනක් වීදි බැස තිබේ.

අවිනිශ්චිත තත්වයක පසුවන සරණාගතයන් සඳහා ස්ථිර වීසා බලපත්‍ර ලබා දෙන මෙන් ඉල්ලා සිටිමින් ලාංකික දෙමළ හා ඉරාන කාන්තාවන් පෙරමුණ ගත ‘වීසා සමානාත්මතාවය සඳහා වන සරණාගත කාන්තා ක්‍රියාකාරීත්වය’ (Refugee Women Action for Visa Equality – RWAVE) මෙල්බර්න් සිට කැන්බරා දක්වා ගමන් ගන්නා කිලෝමීටර් 640 ක සුවිශේෂී පාගමනට දැනට දින 5කි.

ඔවුන් පවසන්නේ වීසා ලබා දීමේදී ක්‍රියාත්මක වන ‘ඉක්මන්’ ක්‍රමවේදයේ (‘fast track’ system) දැඩි දෝෂ පවතින බැවින් පුද්ගලයන් 12,000ක් පමණ දැඩි අවිනිශ්චිත තත්වයකට පත්ව ඇති බවයි.

එරට ආගමන, පුරවැසිභාවය සහ බහු සංස්කෘතික කටයුතු පිළිබඳ අමාත්‍ය ඇන්ඩෘ ගයිල්ස්ගේ කාර්යාලය ඉදිරියෙන්, 22 වැනි සිකුරාදා දින කාන්තා සරණාගතයන් විසින් මෙහෙයවනු ලබන මෙම දීර්ඝ පාගමනේ සමාරම්භය සනිටුහන් විය.

විවිධ පසුබිම් සහිත සරණාගතයන් සහ එරට රැකවරණ පතන්නන් සිය එකමුතුකම සහ අධිෂ්ඨානය ප්‍රබල ලෙස ප්‍රදර්ශනය කරමින්, ඕස්ට්‍රෙිලියානු ප්‍රජාතන්ත්‍රවාදයේ හදවත වන කැන්බරා හි පිහිටි පාර්ලිමේන්තු මන්දිරය වෙත ගමන් කරන මෙම පාදචාරිකාව වෙනුවෙන් එකට එකතු වී සිටී.

ඕස්ට්‍රෙිලියාව තුල වීසා නිකුත් කිරීම සම්බන්ධයෙන් ක්‍රියාත්මක වෙන මේ “ඉක්මන්” ක්‍රමවේදය තුළ පවතින තක්සේරු ක්‍රම, විනිවිදභාවය සහ සාධාරණත්වය පිළිබඳ බරපතල ගැටළු මතු කරන බවයි RWAVE පවසන්නේ. “ඔවුන්ගේ ජීවිත පමණට වැඩි කාලයක් ඇනහිට ඇත.”

අගමැති ඇන්තනි ඇල්බනීස් යටතේ පවතින එරට පාලක කම්කරු පක්ෂය ද මෙම දිගු පා ගමනේ සංවිධායකයන්ගේ විවේචනයට ලක් විය.

“නාවුරු සහ පැපුවා නිව්ගිනියා වල ඉදන් ඕස්ට්‍රෙිලියාවට ගෙනාපු සරණාගතයොත් මේ වගේම අවිනිශ්චිත තත්වයකට මුහුණ පාල තියෙන්නේ. වෙනස්කම් ගැන ලේබර් පක්ෂය මොන පොරොන්දු දුන්නත් තවමත් ඔවුන්ගේ අනාගතය අවිනිශ්චිතයි. මෙම අවිනිශ්චිතතාවයේ චක්‍රය අවසන් කරන්න දැං කාලය ඇවිත්.”

පාද යාත්‍රාවට නායකත්වය දෙන ගීතා රාමචන්ද්‍රන් තිදරු දෙමළ මාතාවකි:

“ඕස්ට්‍රේලියාවේ ඉපදුනු මගේ එක දරුවෙක් වෙන රටක් තමන්ගේ නිවහන හැටියට සලකන්නේ නැහැ. තව දස දහස් ගණනක් කාන්තාවන් වගේ මම උස් මහත් උනේ ශ්‍රී ලංකාවේ සිවිල් යුද්ධයේ ප්‍රචණ්ඩත්වයට මැදි වෙලා. මගේ දෙමාපියෝ සරණාගතයෝ, මම සරණාගතයි, මගේ ළමයි සරණාගතයෝ. ඒ ප්‍රචණ්ඩත්වයයි, අවිනිශ්චිතතාවයි අපි පරම්පරාවෙන් පරම්පරාවට ගෙනියනවා. මම මේ පා ගමනේ අවසානය වෙනකල්ම යන්නේ මායි, මගේ පවුලේ උදවියයි හින්දා විතරක් නෙවෙයි. ඒ අවිනිශ්චිත භාවයට ඇදලා දාලා තියෙන හැමෝම වෙනුවෙන්.”

දයානුකම්පාව, සාධාරණත්වය සහ යුක්තිය පිළිබඳව තමන් මෙන්ම විශ්වාස කරන්නා වූ නීති සම්පාදකයන්, නීතිඥයන් සහ අදාල පුරවැසියන්ගේ අවධානයට මෙම පාගමන ලක්වී, සියලුම සරණාගතයන් ආරක්ෂා කිරීමට සහ ඔවුනට සහාය දැක්වීමට මෙන්ම ඔවුන්ගේ දුක් වේදනා හා පවතින අවිනිශ්චිතතාවය අවසන් කිරීම වෙනුවෙන් මෙම ඉල්ලීම් වලට ඇහුම්කන් දී අර්ථවත් ක්‍රියාමාර්ග ගන්නා ලෙස ඕස්ට්‍රෙිලියානු රජයෙන් ඉල්ලා සිටිනු ඇති බවට මෙම පා ගමනේ සංවිධායකයන් විශ්වාසය පළ කරයි.

“සියලු සරණාගතයන්, රැකවරණ පතන්නන් සහ ඔවුන්ගේ පවුල් වෙනුවෙන් අපි යුක්තිය, ආරක්ෂාව සහ නිශ්චිතභාවය ඉල්ලා සිටිමු. කිසිම අයකු අතනොහැරිය යුතු බවත් සියලුම සරණාගතයන්ගේ අයිතිවාසිකම් පිළිගෙන ඒවා තහවුරු කළ යුතු බවත් අපි විශ්වාස කරමු. ඔවුන්ගේ දරුවන් සඳහා අධ්‍යාපනය ලැබීමේ අයිතිවාසිකම් මෙන්ම වැඩිහිටියන් සඳහා රැකියා වල නිරත වීමේ අයිතිවාසිකම් ද මෙයට ඇතුළත් වේ.”

මේ අතර RWAVE පාගමනට සහ ඔවුන්ගේ ඉල්ලීම් වලට සහය දැක්වීමට තමන් සාඩම්බරයෙන් ඉදිරිපත් වන බවට එරට වික්ටෝරියා ප්‍රාන්තය පදනම් කරගත් ‘සෞඛ්‍ය හා ප්‍රජා සේවා සංගමය’ (Health and Community Services Union – HACSU) ප්‍රකාශ කර තිබේ.